Nashik Crime : भयंकर! दारू प्यायले, नशेत मित्राने काढला मित्राचा काटा; नाशिकमध्ये खळबळ

अभिजित सोनावणे, नाशिक

नाशिकच्या देवळी गावातून धक्कादायक घटना समोर आली आहे. दोन मित्रांमध्ये दारू पिताना क्षुल्लक कारणावरून झालेल्या वादाने रौद्र रूप घेतले. या वादातून एकाची हत्या करण्यात आली. आरोपी तरुण आणि मृत तरुण फार जवळचे मित्र होते. या घटनेने परिसरात खळबळ उडाली असून या प्रकरणी उपनगर पोलीस ठाण्यात खुनाचा गुन्हा दाखल करण्यात आला असून पोलिसांनी संशयित आरोपीला अटक केली आहे.पोलीस या घटनेचा पुढील तपास करत आहेत.विशाल माळवे असे मृत तरुणाचे नाव असून योगेश गायकवाड असे आरोपीचे नाव आहे.

मिळालेल्या माहितीनुसार, विशाल माळवे आणि योगेश गायकवाड हे दोघे मित्र गुरुवारी रात्री नेहमीप्रमाणे देवळाली गावात एकत्र बसून दारू पित होते. यावेळी दोघांमध्ये काही कारणावरून शाब्दिक वाद सुरू झाला. सुरुवातीला किरकोळ असलेला हा वाद हळूहळू वाढत गेला आणि दोघांमध्ये बाचाबाची झाली. वाद विकोपाला गेल्यानंतर संतापाच्या भरात योगेश गायकवाडने जवळ असलेल्या हत्याराने विशाल माळवे याच्यावर सपासप वार केल्याचे सांगितले जात आहे. अचानक झालेल्या या हल्ल्यामुळे विशाल गंभीर जखमी झाला.

हल्ला इतका गंभीर होता की त्याचा घटनास्थळीच मृत्यू झाला. घटनेची माहिती मिळताच परिसरातील नागरिकांनी मोठी गर्दी केली आणि तातडीने पोलिसांना कळवण्यात आले. घटनेची माहिती मिळताच उपनगर पोलिसांचे पथक घटनास्थळी दाखल झाले. पोलिसांनी परिसराची पाहणी करून पुरावे गोळा केले, तसेच मृतदेह ताब्यात घेऊन शवविच्छेदनासाठी पाठवला.

तपासाची चक्रे वेगाने फिरवत पोलिसांनी अवघ्या काही तासांत संशयित आरोपी योगेश गायकवाड याचा शोध घेत त्याला ताब्यात घेतले. या प्रकरणी उपनगर पोलीस ठाण्यात भारतीय न्याय संहितेच्या संबंधित कलमांनुसार खुनाचा गुन्हा दाखल करण्यात आला आहे.