Nashik : वर्दीचा रुबाब आणि AI चा डर्टी गेम, महिलांना लुटणाऱ्या तोतया पोलिसाला अटक

अभिजित सोनावणे, नाशिक

तंत्रज्ञानाचा वापर खरतर प्रगतीसाठी आणि नवनवीन गोष्टी शिकण्यासाठी होतो. मात्र अलीकडे याचा गैरवापर मोठ्या प्रमाणात होताना पाहायला मिळत आहे. नाशिकच्या सिन्नरमध्ये AI च्या मदतीने स्वतःचे पोलीससारखे दिसणारे गणवेशातील बनावट फोटो तयार करून महिलांना प्रेमाच्या जाळ्यात ओढणाऱ्या एका भामट्याला वावी पोलिसांनी अटक केली आहे. या घटनेने महिलांनी संताप व्यक्त केला आहे. पोलीस या प्रकरणाचा अधिक तपास करत आहेत.

मिळालेल्या माहितीनुसार, आरोपीचे नाव आसिफ तडवी असे आहे. आसिफने सोशल मीडियावर पोलीस अधिकारी असल्याचे भासवून बनावट नावाने खाती उघडली होती. या बनावट अकाऊंटवरून त्याने अनेक महिलांना पोलीस दलात असल्याचे खोटे सांगून त्यांच्यावर आपली छाप पाडली आणि त्यांना प्रेमाच्या जाळ्यात ओढलं. त्याने AI तंत्रज्ञानाचा वापर करून स्वतःचे पोलीस ठाण्यात बसलेले आणि पोलीस गणवेशातील अत्यंत हुबेहूब दिसणारे फोटो तयार केले होते.

सोशल मीडियाच्या माध्यमातून त्याने एका महिलेशी संपर्क साधला. खाकी वर्दीचा रुबाब दाखवून त्याने तिला प्रेमाच्या जाळ्यात ओढले. एकदा विश्वास संपादन केल्यानंतर, कधी घरगुती अडचणींचे कारण तर कधी पोलीस ट्रेनिंगचा बहाणा सांगून त्याने या महिलेकडून तब्बल ३ लाख रुपये उकळले. जेव्हा पीडित महिलेने अधिक पैसे देण्यास नकार दिला, तेव्हा तडवीने आपले खरे रूप दाखवले. त्याने AI च्या मदतीने पीडित महिलेचे आक्षेपार्ह फोटो तयार केले आणि ते सोशल मीडियावर व्हायरल करण्याची धमकी देऊन तिला ब्लॅकमेल करण्यास सुरुवात केली.

आपली फसवणूक झाल्याचे समजताच पीडित महिलेने पोलीस ठाण्यात धाव घेतली. वावी पोलीस ठाण्यात तक्रार दाखल केली. पोलिसांनी घटनेचे गांभीर्य ओळखून तपास सुरू केला. संशयित आसिफ तडवी हा महिलेला भेटण्याच्या बहाण्याने आला असता, वावी पोलिसांनी अत्यंत शिताफीने त्याला ताब्यात घेतले आणि त्याच्या मुसक्या आवळल्या. याप्रकरणी पोलीस सखोल तपास करत आहेत.