अशोक खरातच्या संपत्तीत 7400 टक्क्यांची वाढ; 7 वर्षात कशी वाढली संपत्ती? फाईल्समधून धक्कादायक माहिती समोर

वासनांध भोंदू अशोक खरातच्या एसआयटीनं मुसक्या आवळल्या. आणि खरातच्या काळ्या कारनाम्यांचं बिंग फुटलं. तपासात एकेक धागा उलगडताना खरातच्या हजारो कोटींच्या संपत्तीचा भांडाफोड झाला. नाशिक, अहिल्यानगर जिल्ह्यात खरातच्या संपत्तीचं जाळं असल्याचं समोर आलं. मात्र आता खरातचा अध्यात्माच्या नावाखाली श्री शिवनिका संस्थानचा आधार घेत जो वासनांध धंदा सुरु होता. त्यातून हजारो कोटींची संपत्ती जमा केली. अवघ्या 7 वर्षात खरातच्या संपत्तीत तब्बल 7 हजार 400 टक्के वाढ झाल्याची धक्कादायक माहिती समोर आलीय. मात्र ही वाढ कशी झालीय? पाहूयात.

वासनांध खरातच्या श्री शिवनिका संस्थानची 2017-18 मध्ये 4 लाख 67 हजार 609 रुपये इतकीच संपत्ती होती. त्यानंतर तीन वर्षांनी 2020-21 मध्ये याच खरातची संपत्ती 1 कोटी 54 लाख इतकी झाली. तर पुढे 2024-25 मध्ये खरातच्या संपत्तीनं नवा उच्चांक गाठत 2 कोटी 25 लाखांची संपत्ती असल्याचं जाहीर केलं. त्यात फक्त 2024 या एका वर्षात 76 लाख रुपयांची देणगी जमा झाल्याचं समोर आलं.. त्यामुळेच संशय बळावलाय.

खरं तर 2017 मध्ये खरातचं संस्थान तुटीत असल्याचं दाखवण्यात आलं होतं.. मात्र अवघ्या 7 वर्षात 7400 टक्क्यांनी खरातची संपत्ती वाढलीय..मात्र एखाद्या ज्योतिषशास्त्राच्या संस्थानाच्या मालकाची मालमत्ता तब्बल ७४ पटीनं वाढूच कशी शकतेय, असा सवाल विचारला जातोय. कारण सर्वसाधारण नोकरदार किंवा व्यावसायिकाची संपत्तीही दूरदूरवर एवढ्या पटीने वाढू शकत नाही.

खरं तर एखाद्या नोकरदाराचा पगार दरवर्षी 8-12 टक्क्यांनी वाढतो. यानुसार 7 वर्षात त्याची संपत्ती 84 टक्क्यांपर्यंतच वाढू शकते. तर एखाद्या व्यावसायिकानेही 100 टक्के नफा कमावला तरी त्याची संपत्ती 700 टक्क्यांपेक्षा जास्त वाढण्याची शक्यताच नाही. त्यामुळेच खरातच्या संपत्तीत तब्बल 7400 टक्क्यांनी झालेली वाढ ही चक्रावणारी आहे. ही संपत्ती राजकीय आणि प्रशासकीय लागेबांध्याशिवाय निर्माण होऊच शकत नाही . 2018 ते 2025 याच कालावधीत अनेक राजकीय नेते, प्रशासकीय अधिकारी, उद्योगपतींचा खरातच्या दरबारी असलेला राबता हे च यामागचं कारण होत का. त्यामुळे आता खरातच्या सगळ्याच आर्थिक कनेक्शनचा आणि त्याला मदत करणाऱ्यांचा तपास तर व्हायलाच हवा पण केवळ खरात नव्हे तर खरातच्या आकांचाही बुरखा फाडायला हवा.