Nashik Accident: नाशिकमध्ये भीषण अपघात! भरधाव कारची दुचाकीला धडक; दोघांची प्रकृती गंभीर

तबरेज शेख, नाशिक|ता. १९ एप्रिल २०२४

नाशिकमधून एक भीषण अपघाताची घटना समोर आली आहे. नाशिक शहरातील गंजमाल परिसरात नवी कोरी थार गाडी आणि दुचाकीचा भीषण अपघात झाला. या अपघातामध्ये दुचाकीवरील दोघे गंभीर झाले असून सध्या त्यांच्यावर उपचार सुरू आहेत.

याबाबत सविस्तर माहिती अशी की, नाशिक (Nashik) चारचाकी आणि दुचाकीचा भीषण अपघात झाल्याची घटना गुरूवारी रात्री घडली. भरधाव थार गाडीने दुचाकीला धडक दिल्याने हा अपघात झाल्याचे सांगण्यात येत आहे. या अपघातात दुचाकीवरील दोन्ही तरुण गंभीर जखमी झालेत.

अपघातातील जखमींवर जिल्हा रुग्णालयात सध्या उपचार सुरू असून दोघांची प्रकृती गंभीर असल्याचे सांगण्यात येत आहे.ही धडक इतकी भीषण होती की अपघातात दुचाकीचा अक्षरशः चक्काचूर झाला. तर नवी कोरी थार गाडी अपघातानंतर थेट दुभाजकावर चढली.

दरम्यान, या अपघाताची माहिती मिळताच स्थानिकांसह पोलिसांनी घटनास्थळी धाव घेतली. भद्रकाली पोलिसांनी या प्रकरणी भरधाव वेगाने कार चालवणाऱ्या चालकाला ताब्यात घेतले आहे. पोलीस या प्रकरणी अधिक तपास करत आहेत.