Nashik : झोपलेल्या शेतकरी दांपत्यावर अ‍ॅसिड हल्ला; नाशिकमधील धक्कादायक घटना

नाशिक जिल्ह्यातील येवला तालुक्यात एक धक्कादायक घटना समोर आली आहे. देवळाणे येथील बोराडे वस्तीवर अज्ञात व्यक्तीने झोपेत असलेल्या दाम्पत्यावर अ‍ॅसिड फेकल्याची गंभीर घटना घडली आहे. या हल्ल्यात शेतकरी भाऊसाहेब बोराडे आणि त्यांच्या पत्नी कांता बोराडे गंभीर जखमी झाले असून, त्यांच्यावर येवला येथील खासगी रुग्णालयात उपचार सुरू आहेत. या घटनेमुळे संपूर्ण येवला तालुक्यात खळबळ उडाली आहे.

मिळालेल्या माहितीनुसार, भाऊसाहेब बोराडे आणि त्यांची पत्नी कांता बोराडे हे नेहमीप्रमाणे रात्रीच्या वेळी घराच्या टेरेसवर झोपले होते. मध्यरात्रीच्या सुमारास अज्ञात व्यक्तीने त्यांच्या अंगावर अचानक अ‍ॅसिड फेकले. अचानक झालेल्या या हल्ल्यात दोघेही गंभीर जखमी झाले. गंभीर अवस्थेत असलेल्या दाम्पत्याला तातडीने येवला येथील खासगी रुग्णालयात दाखल करण्यात आले.

घटनेची माहिती मिळताच नाशिकचे जिल्हा पोलीस अधीक्षक डॉ. डी. एस. स्वामी यांनी तात्काळ रुग्णालयात भेट देत जखमींची विचारपूस केली. तसेच डॉक्टरांकडून त्यांच्या प्रकृतीची माहिती घेतली. यावेळी मनमाड विभागाचे उपविभागीय पोलीस अधिकारी बाजीराव महाजन आणि येवला तालुका पोलीस निरीक्षक संदीप मंडलिक हे देखील उपस्थित होते.

दरम्यान, या प्रकरणी येवला तालुका पोलीस ठाण्यात अज्ञात व्यक्तीविरोधात गुन्हा दाखल करण्यात आला आहे. आरोपीचा शोध घेण्यासाठी पोलिसांनी विशेष पथके तयार केली असून पुढील तपास सुरू आहे. या हल्ल्यामागचे नेमके कारण अद्याप स्पष्ट झाले नसून, वैयक्तिक वाद की इतर कोणता हेतू होता याचा तपास पोलीस करत आहेत. या घटनेनंतर परिसरातील नागरिकांमध्ये भीतीचे वातावरण निर्माण झाले आहे. या प्रकारामुळे नागरिकांनी संताप व्यक्त करत आरोपीला तातडीने अटक करण्याची मागणी केली आहे.