Shocking : पर्यटनस्थळी फिरायला गेलेल्या वैद्यकीय अधिकाऱ्याचा घात झाला; आमदारी पॉईंटवरून पडून मृत्यू

थंड हवेचे ठिकाण म्हणून ओळखले जाणारे नंदुरबार जिल्ह्यातील तोरणमाळ पर्यटनस्थळ पुन्हा एकदा दुर्दैवी घटनेमुळे चर्चेत आले आहे. येथे आमदारी पॉईंटवरून खाली पडल्याने एका तरुण वैद्यकीय अधिकाऱ्याचा मृत्यू झाला आहे. ही घटना सोमवारी संध्याकाळच्या सुमारास घडली असून या घटनेमुळे परिसरात शोककळा पसरली आहे. मृत तरुणाचे नाव शुभम जगताप असे आहे.

मिळालेल्या माहितीनुसार, शुभम जगताप हे बुलढाणा जिल्ह्यातील रहिवाशी होते. जगताप हे तोरणमाळ ग्रामीण रुग्णालयात गेल्या एका वर्षांपासून वैद्यकीय अधिकारी म्हणून कार्यरत होते. नंदुरबार मधील तोरणमाळ हे थंड हवेचे ठिकाण असून येथे पर्यटक मोठ्याप्रमाणावर फिरण्यासाठी येतात. तसेच स्थानिक नागरिकांची देखील येथे रेलचेल असते. जगताप हे देखील तोरणमाळ येथे फिरण्यासाठी गेले होते.

या दरम्यान जगताप यांचा आमदारी पॉईंटवरून थेट दरीत पडल्याने मृत्यू झाला आहे. स्थानिक लोकांच्या मदतीने मृत देह बाहेर काढला असून तो राणीपूर ग्रामीण रुग्णालयात शवविच्छेदनासाठी घेऊन जाण्यात आला आहे. घडलेल्या घटनेप्रकरणी पोलीस ठाण्यात नोंद करण्यात आली असून पोलीस या घटनेचा सविस्तर तपास करत आहेत.

मात्र जगताप हे दरीत पडले की हा घातपात होता हे अद्यापही समोर आलेलं नाही. शुभम जगताप या वैद्यकीय अधिकाऱ्यासोबत नेमकं काय घडलं ? हे अद्यापही अनुत्तरित आहे. दरम्यान नंदुरबार जिल्ह्याला परतीच्या पावसाने झोडपलं असून गावातील शेतकऱ्यांचे मोठ्या प्रमाणावर नुकसान झाले आहे.