Accident News : भरधाव कार थेट घरात घुसली; अंकलेश्वर बुऱ्हाणपूर महामार्गावर थरकाप उडविणारा अपघात

सागर निकवाडे 
नंदुरबार : अंकलेश्वर- बुऱ्हाणपूर महामार्गावर थरकाप उडविणारा अपघात घडला आहे. शहादा तालुक्यातील मनरद गावात हिट अँड रनचा थरार पाहण्यास मिळाला असून यात भरधाव वेगाने येणाऱ्या कारवरील चालकाचे नियंत्रण सुटून कार थेट घरात घुसली आहे. हा अपघात पाहणाऱ्यांच्या अंगाचा थरकाप उडाला होता. दरम्यान अपघातात चारजण गंभीर जखमी झाले असून घराचे मोठे नुकसान झाले आहे. 

नंदुरबार जिल्ह्यातील शहादा तालुक्यातील मनरद गावाजवळील अंकलेश्वर-बुरहानपूर महामार्गावर एक गंभीर अपघात घडला. भरधाव वेगात असलेली आर्टिका कार अचानक नियंत्रण सुटल्याने रस्त्यालगत असलेल्या एका घरात घुसली. कारवरील नियंत्रण सुटल्याने भरधाव कार रस्त्यावरून खाली उतरून थेट घरात गेली. या अपघातात राहुल विठोबा कोळी हे गंभीर जखमी झाले आहेत. तर अन्य तीन जण जखमी झाले आहेत.

एकाची प्रकृती चिंताजनक 

अपघातानंतर परिसरातील नागरिकांनी लागलीच धाव घेत त्वरित मदतकार्य सुरू करण्यात आले.  दरम्यान अपघातात जखमी झालेल्यांमध्ये कार मालक फारुख मणियार यांचा समावेश असून, त्यांना छातीत व पायाला मार लागला आहे. सर्व जखमींना मोहिदा येथील आरोग्य केंद्रात उपचारासाठी दाखल करण्यात आले आहे. तर राहुल विठोबा कोळी यांना खासगी रुग्णालयात उपचारासाठी दाखल करण्यात आला त्यांची परिस्थिती चिंताजनक असल्याचे सांगितले जात आहे. 

अपघाताचे कारण अस्पष्ट 
अपघात इतका भीषण होता कि अपघात पाहणाऱ्यांच्या अंगाचा थरकाप उडाला होता. तर सदर अपघातामुळे परिसरात काही काळ भीतीचे वातावरण निर्माण झाले होते. स्थानिक ग्रामस्थांनी तत्काळ मदतीला धाव घेत रस्त्यावरील वाहतूक सुरळीत केली. अपघाताचे नेमके कारण अद्याप स्पष्ट झाले नसले तरी पोलिसांकडून तपास सुरू आहे.