Accident : प्रवासी टॅक्सी आणि ट्रकची जोरदार धडक; गाडीचा चक्काचूर; 5 प्रवासी गंभीर जखमी , दोघांची प्रकृती चिंताजनक

मिळालेल्या माहितीनुसार, आज सकाळच्या सुमारास शहादा तालुक्यातील लांबोळा गावाजवळ हा भीषण अपघात झाला आहे. नंदुरबारहुन शहादाच्या दिशेने एक प्रवासी टॅक्सी जात होती. त्याच सुमारास मालवाहू ट्रक सुद्धा त्याच मार्गावरून जात होता. यादरम्यान दोघांची जोरदार धडक झाल्याने दुर्दैवी अपघात झाला.

हा अपघात इतका भीषण होता की टॅक्सी आणि ट्रकचा चक्काचूर झाला. शिवाय या दुर्घटनेत पाच जण जखमी असून २ जणांची प्रकृती गंभीर आहे. अपघाताचा आवाज ऐकून स्थानिक नागरिकांनी तातडीने घटनास्थळी धाव घेतली.

मदतीसाठी धाव घेत जखमींना उपचारासाठी रुग्णालयात दाखल केले. काही काळ घटनास्थळाच्या आजूबाजूच्या परिसरात तणाव निर्माण झाला होता. मात्र हा अपघात कशामुळे झाला? हे अद्यापही समोर आलेले नाही. याप्रकरणी पोलीस तपास करत आहेत.