शाळेच्या मध्यंतरानंतर थरार! विद्यार्थ्याला निर्जनस्थळी नेऊन गळ्यावर अन् पोटावर वार

संजय सूर्यवंशी, साम टीव्ही

नांदेड: क्रिकेट खेळण्यावरून झालेल्या किरकोळ वादाचे रूपांतर थेट चाकू हल्ल्यात झाल्याची धक्कादायक घटना नांदेड शहरा लगत असलेल्या असर्जन येथील शंकरराव चव्हाण विद्यालयात घडली आहे. या हल्ल्यात 16 वर्षीय इयत्ता 10 वीतील विद्यार्थी गंभीर जखमी झाला असून त्याच्यावर विष्णुपुरी येथील शासकीय रुग्णालयात उपचार सुरु आहेत. ही घटना शनिवारी शाळेच्या मध्यंतरानंतर घडली. मिळालेल्या माहितीनुसार, शनिवारी शाळेत क्रिकेट खेळण्यावरून विद्यार्थी दोन गटांमध्ये वाद झाला होता. हा वाद तिथेच मिटला असल्याचे दिसत असले तरी तो मनात धरून ठेवण्यात आला होता.

आज सोमवारी शाळेच्या मध्यंतरानंतर आरोपी असलेल्या दोन विद्यार्थ्यांनी जखमी विद्यार्थ्याला शाळेजवळील शिव मंदिराच्या पाठीमागील निर्जनस्थळी नेऊन त्याच्यावर चाकूने हल्ला केला. हल्लेखोरांनी त्याच्या गळ्यावर आणि पोटात चाकूने वार केले. रक्तबंबाळ अवस्थेत विद्यार्थी खाली कोसळताच आरोपी तेथून पसार झाले. घटनेची माहिती मिळताच शाळा प्रशासन आणि स्थानिक नागरिकांनी जखमीला तातडीने विष्णुपुरी येथील शासकीय रुग्णालयात दाखल केले. सध्या त्याच्यावर उपचार सुरु असून त्याची प्रकृती स्थिर असल्याचे डॉक्टरांनी सांगितले.

घटनेनंतर पोलिसांनी तातडीने कारवाई करत दोन्ही आरोपी विद्यार्थ्यांना ताब्यात घेतले आहे. अल्पवयीन असल्याने त्यांना बालसुधारगृहात पाठवण्याची प्रक्रिया सुरु आहे. एका किरकोळ कारणावरून विद्यार्थ्यांनी केलेल्या या टोकाच्या पावलामुळे पालक आणि शिक्षकांमध्ये भीतीचे वातावरण आहे. शाळेत सुरक्षा वाढवण्याची मागणी जोर धरत आहे. या घटनेचा पुढील तपास पोलीस करत आहेत.