Nanded Crime : यात्रेकरू चहा पिण्यासाठी हॉटेलवर थांबताच चोरट्याने साधला डाव; दागिन्यांसह रोख रक्कम असलेली पर्स घेऊन पसार

संजय सूर्यवंशी 
नांदेड : देवीच्या दर्शनाला जात असताना लांबच्या प्रवासात महामार्गावरील एका हॉटेलवर चहा पिण्यासाठी गाडी थांबविली. सर्वजण खाली उतरून चहा पिण्यासाठी हॉटेलवर गेले. हीच संधी साधत चोरट्याने गाडीत ठेवलेली पर्स लांबविली असून यात साधारण अडीच तोळे सोन्याच्या दागिन्यांसह रोख ४० हजार रुपये व दोन मोबाईल चोरीला गेले आहेत. 

नांदेडच्या अर्धापूर शहरातील हॉटेलवर सदरची घटना घडली. बीड जिल्ह्यातील शिंदेवाडी येथील महादेव गिरी हे माहूरच्या श्री रेणुका मातेचे दर्शन घेऊन गावाकडे परतत होते. गाडी चालकाने नांदेड ते नागपूर महामार्गावरील अर्धापूर येथील एका पेट्रोल पंपाच्या बाजूला असलेल्या हॉटेलवर दहा पिण्यासाठी गाडी थांबविली. यामुळे सर्व यात्रेकरूंसोबत महादेव गिरी हे देखील खाली उतरून हॉटेलवर गेले होते.  

गाडीत कोणी नसल्याची साधली संधी 

छोटा हत्ती या प्रवासी गाडीमध्ये सर्व भाविकांच्या साहित्यांसोबत पर्स देखील होती. गाडीत कोणीच नसल्याची संधी साधत चोरट्याने या गाडीमधील पर्स लांबविली. सदर पर्समध्ये अडीच तोळे सोने, रोख ४० हजार रुपये आणि दोन मोबाईल चोरट्याने लंपास केले. प्रवाशांच्या हा प्रकार लक्षात आला. मात्र चोरटा पसार झाला होता. या प्रकरणी पोलिसात तक्रार दाखल करण्यात आली असून चोरट्याचा शोध अर्धापूर पोलीस घेत आहेत. 

पर्स हिसकावून पाळणाऱ्या चोरट्याला बेदम मारहाण 

दिवाळीच्या तोंडावर सध्या मार्केटमध्ये मोठी गर्दी आहे. या गर्दीचा फायदा घेत चोरट्यांचा सुळसुळाट पाहण्यास मिळत आहे. दरम्यान राजगुरुनगर येथे बाजारपेठेच्या मुख्य रस्त्यावर महिलेची पर्स हिसकावून पाळणाऱ्या चोरट्याला पकडण्यात यश आले. यानंतर चोरट्याला पकडून नागरिकांकडून बेदम मारहाण करण्यात आली. यानंतर चोरट्याला पोलिसांच्या ताब्यात दिले. खेड पंचायत समितीच्या गेट समोर वाडा रस्त्यावर घटना घडली आहे.