Shocking: २ महिन्यांपूर्वी लग्न, दिवाळीनिमित्त घरी आले; घरात आढळले शिक्षक दाम्पत्याचे मृतदेह

नागपुरात कुटुंबियांसोबत दिवाळी साजरी करण्यासाठी आलेल्या शिक्षक दाम्पत्याने गळफास घेत आत्महत्या केल्याची धक्कादायक घटना घडली. मनीष प्रल्हाद गणवीर आणि सोनाली मनीष गणवीर असे आत्महत्या केलेल्या दाम्पत्याची नावं आहेत. दोघेही गडचिरोली जिल्ह्यातील सुरजागड येथील शाळेत शिक्षक म्हणून कार्यरत होते. शिक्षक दाम्पत्याच्या आत्महत्येमुळे नागपुरात खळबळ उडाली.

बेलतरोडी पोलिस ठाण्याच्या हद्दीतील बेसा येथील रेवतीनगरमध्ये ते राहत होते. घराचा दरवाजा बंद करून ओढणीने गळफास घेऊन दोघांनी आत्महत्या केली. दिवाळीनिमित्त नातेवाईक घरी भेटण्यासाठी आले असता ही घटना उघडकीस आली. फॅनला लटकलेल्या अवस्थेत त्यांचे मृतदेह आढळून आले. दोघांनी टोकाचे पाऊल का उचलले? अद्याप कळू शकले नाही.

दोघेही अगोदरच घटस्फोटीत होते. गडचिरोलीतील सूरजागड येते ते शिक्षक होते. तिथेच दोघांची ओळख झाली. दोघेही वेगवेगळ्या जातीचे होते. एकमेकांच्या प्रेमात पडल्यानंतर त्यांनी लग्न करण्याचा निर्णय घेतला. ३१ ऑगस्टला त्यांनी लग्न केले. लग्नानंतर ते नेहमी नागपूरला यायचे. दिवाळीनिमित्त घरी आले असता त्यांनी आत्महत्येसारखं टोकाचं पाऊल उचललं.

मनीषचे कुटुंबीय बुद्धगया येथे फिरण्यासाठी गेले होते. त्यामुळे घरात कुणीच नव्हते. मनीष आणि सोनाली दोघेही नागपूरला दिवाळीसाठी आले होते. त्यांच्यामध्ये दुपारी कडाक्याचे भांडण झाले. पण नंतर आवाज बंद झाला, अशी माहिती शेजारच्यांनी दिली. दुसऱ्या दिवशी सकाळी त्यांचे नातेवाईक घरी आले असता त्यांना मनीष आणि सोनाली गळफास घेतलेल्या अवस्थेत दिसले. त्यांनी तात्काळ पोलिसांना घटनेची माहिती दिली.

मनीष आणि सोनाली यांचे मृतदेह एकाच फॅनला ओढणीच्या सहाय्याने गळफास घेतलेल्या अवस्थेत आढळून आले. घरातील हॉलमध्ये पोलिसांनी दारूची बॉटल आणि दोन ग्लास आढळून आले. याप्रकरणी आकस्मिक मृत्यूची नोंद करून पोलिसांनी तपास सुरू केला आहे. मुलगा आणि सून या दोघांनी आत्महत्या केल्यामुळे गणवीर कुटुंबीयांना दु:खाचा डोंगर कोसळला आहे.