Accident: नागपुरमध्ये खासदाराच्या कारला भीषण अपघात, रुग्णालयात उपचार सुरू; वाहनाचा चक्काचूर

Summary -

• नागपूर बायपासवर खासदार डॉ. प्रशांत पडोळे यांच्या कारला भीषण अपघात झाला.

• ट्रकच्या धडकेमुळे त्यांच्या फॉर्च्युनर कारचे मोठे नुकसान झाले.

• खासदार पडोळे किरकोळ जखमी झाले असून रुग्णालयात उपचार घेत आहेत.

• अपघातामुळे त्यांच्या समर्थकांमध्ये चिंतेचे वातावरण निर्माण झाले आहे.

शुभम देशमुख, भंडारा

नागपूरमध्ये काँग्रेस खासदाराच्या वाहनाला भीषण अपघात झाला. खासदार डॉ. प्रशांत पडोळे यांच्या कारला नागपूर बायपासवर उमरेड फाट्याजवळ अपघात झाला. आज पहाटे अपघाताची ही घटना घडली. जखमी अवस्थेत प्रशांत पडोळे यांना रुग्णालयात दाखल करण्यात आले. त्यांच्यावर सध्या उपचार सुरू आहेत. या अपघातामध्ये ते थोडक्यात बचावले. अपघातामध्ये प्रशांत पडोळे यांच्या कारचे मोठे नुकसान झाले.

मिळालेल्या माहितीनुसार, उपराष्ट्रपती पदाची निवडणूक आटोपून मुंबईमार्गे भंडाऱ्याकडे परत येत असताना खासदाराच्या वाहनाला भीषण अपघात झाला. भंडारा गोंदिया जिल्ह्याचे काँग्रेस पक्षाचे खासदार डॉ. प्रशांत पडोळे यांच्या कारला आज पहाटे अपघात झाला. नागपूर बायपासवरील उमरेड फाट्याजवळ ही घटना घडली. या अपघातात खासदार पडोळे थोडक्यात बचावले. ते जखमी झाले असून त्यांना रुग्णालयात दाखल करण्यात आले.

या अपघातामध्ये खासदार पडोळे यांच्या फॉर्च्युनर कारचे मोठे नुकसान झाले. या अपघाताच्या वेळी कारमध्ये खासदार स्वतः उपस्थित होते. दिल्ली येथे उपराष्ट्रपती पदाकरिता मतदान करून ते विमानाने मुंबईला पोहचले. तेथे कार्यालयीन काम पूर्ण केल्यानंतर आपल्या कारने ते भंडाऱ्याकडे परत येत होते. तेव्हा नागपूर बायपासवरील उमरेड फाट्याजवळ त्यांच्या कारला अपघात झाला.

अचानक समोरून आलेल्या ट्रकमुळे खासदार पडोळे यांच्या कार चालकाचे कारवरील संतुलन बिघडले आणि ही कार ट्रकला धडकते. हा अपघात गंभीर असला तरी यामध्ये सुदैवाने कुणाला गंभीर दुखापत झाली नाही. डॉ. प्रशांत पडोळे अपघातामध्ये किरकोळ जखमी झाले. तसंच त्यांच्या कारमधून प्रवास करत असलेले सहकारी सुखरूप आहेत. घटनेची माहिती कळताच त्यांच्या समर्थकांमध्ये चिंतेचे वातावरण निर्माण झाले होते. जखमी अवस्थेत प्रशांत पडोळे यांना रुग्णालयात दाखल करण्यात आले.