प्रसादाच्या गुंगीतून लैंगिक शोषण; SITच्या चौकशीत अशोक खरातचे भयंकर कारनामे उघड, VIDEO

56 अश्लील व्हिडिओ, 11 तक्रारी आणि अनेक महिलांच्या आयुष्याशी खेळणारा खरात आता एसआयटीच्या कचाट्यात चांगलाच अडकलाय...खरातच्या पाशवी कृत्यांबद्दल एक एक धक्कादायक माहिती उघडकीस येत असताना, महिलांना आपल्या जाळ्यात ओढण्यासाठी त्यांना गुंग करण्यासाठी खरात प्रसादाचा वापर करायचा ? पीडित महिलांनीही तक्रारीत प्रसाद खाल्यानंतर शुद्ध हरपल्याचं म्हटलंय.

खरात ऑफिसमध्ये येणाऱ्या महिलांना खाण्यासाठी पेढा आणि पिण्यासाठी खारट किंवा कडवट चवीचे पाणी देत असे. हे पदार्थ सेवन केल्यानंतर महिलांना गरगरणे, मळमळ होणे तसेच डोके जड झाल्यासारखे वाटत असे. त्यांची शुद्ध हरपून त्या आरोपीच्या प्रभावाखाली येत असल्याचं समोर आलंय. त्यानंतर खरात ऑफिसमधील दिवे बंद करून महिलांवर लैगिक अत्याचार करायचं. कौटुंबिक कलह, मूल न होणे, आर्थिक चणचण किंवा वैवाहिक समस्या अशा अडचणीत सापडलेल्या महिलांना खरात हेरायचा. त्यांचा विश्वास जिंकून तो त्यांना संमोहित करायचा..

खरात प्रसादातील पेढ्यात आणि पाण्यात कोणते रसायन किंवा घटक मिसळत होता, हे अद्याप समोर आलेलं नाही. खरातनेही या गूढ औषधाबद्दल SIT तपासात कोणतीच माहिती अद्याप दिली नसल्याचं सरकारी वकील शैलेंद्र बागडे यांनी कोर्टात सांगितलयं. त्यामुळे खरात देत असलेल्या प्रसादाबद्दलचा गूढ आणखी वाढत चाललंय. आता पोलिसच खरातला खाकी हिसक्याचा प्रसाद देऊन गुंगीचं गूढ उलगडणार का? हे पाहणं महत्वाचं आहे.