Flight Ticket Rate : कोकणवासियांसाठी मोठी खूशखबर! आता विमानाने करा स्वस्त अन् मस्त प्रवास; पाहा काय आहेत तिकिटाचे दर

गणेशोत्सवाच्या काळात अनेक जण सापडेल त्या वाटेने गावी जातात. कोणी रेल्वेचा पर्याय निवडला, कोणी बसचा तर कोणी स्वतःच्या कारने कोकणाची वाट धरतो. मात्र आता कमी वेळात कोकण गाठणे सोपे होणार आहे. कारण नवी मुंबई आंतरराष्ट्रीय विमानतळ आणि सिंधुदुर्गातील चिपी विमानतळ यांच्यात थेट विमानसेवा सुरू करण्यासाठी जोरदार तयारी सुरू झाली आहे. या विमान प्रवासाचे भाडेही सर्वसामान्यांना परवडेल असे असून जाहीर करण्यात आले आहे.

कोकण किनारपट्टीला थेट मुंबईच्या व्यापारी केंद्राशी जोडण्यासोबतच सिंधुदुर्गातील पर्यटनाला चालना देण्याच्या उद्देशाने ही विमानसेवा महत्त्वाची मानली जात आहे. नवी मुंबई विमानतळ सुरू झाल्यानंतर या विमानतळावरून कोकणाशी थेट हवाई संपर्क निर्माण होणार आहे. मिळालेल्या माहितीनुसार, नवी मुंबई ते सिंधुदुर्ग या मार्गावरील विमान प्रवासाचे भाडे सुमारे ३,५८० रुपये, तर सिंधुदुर्ग ते नवी मुंबई परतीच्या प्रवासासाठी सुमारे ३,७३५ रुपये असण्याची शक्यता आहे. त्यामुळे वेळ वाचवून कोकण गाठू इच्छिणाऱ्या प्रवाशांसाठी हा पर्याय महत्त्वाचा ठरू शकतो.

दरम्यान, विमानसेवा सुरू करताना विमान कंपन्यांवर काही कडक अटी व शर्ती लागू करण्यात येणार आहेत. विमानसेवेचे नियमन योग्य पद्धतीने व्हावे, प्रवाशांना सुविधा मिळाव्यात आणि सेवा सातत्याने सुरू राहावी, यासाठी प्रशासनाकडून आवश्यक नियम निश्चित केले जात आहेत.

ही थेट विमानसेवा लवकरच सुरू होण्याची शक्यता असून, त्यामुळे गणेशोत्सवाच्या काळात कोकणात जाणाऱ्या चाकरमान्यांना मोठा फायदा होणार आहे. मुंबई ते कोकण प्रवासाचा वेळ कमी करण्यासोबतच सिंधुदुर्गातील पर्यटन आणि स्थानिक व्यवसायांनाही या हवाई जोडणीमुळे नवी चालना मिळण्याची अपेक्षा आहे.