साखर झोपेत असताना काळाचा घाला! मुंबई-आग्रा महामार्गावर तिहेरी अपघात; 6 जणांचा जागीच मृत्यू

भूषण अहिरे, साम टीव्ही

धुळे येथील मुंबई-आग्रा महामार्गावरील लळिंग घाटात सोमवारी पहाटेच्या सुमारास एक भीषण अपघात झाला असून यामध्ये 6 प्रवाशांचा जागीच मृत्यू झाला आहे, तर 10 ते 12 जण गंभीर जखमी झाले आहे. याठिकाणी एक रेतीचा डंपर आणि ट्रॅव्हल्स गाड्यांमध्ये जोरदार धडक होऊन तिहेरी अपघात झाला. या अपघाताची माहिती मिळताच पोलिसांनी तात्काळ घटनास्थळी धाव घेत जखमीना उपचारासाठी नजीकच्या रुग्णालयात दाखल केले आहे. पहाटेच्या वेळी झालेल्या या अपघातामुळे मुंबई-आग्रा महामार्गावरील वाहतूक काही काळ विस्कळीत झाली होती.

मिळालेल्या प्राथमिक माहितीनुसार, लळिंग घाटात चालकाचे वाहनावरील नियंत्रण सुटल्यामुळे हा अपघात घडल्याचा अंदाज आहे. घाटातून जात असताना एका वेगवान डंपरने समोरील ट्रकला जोरदार धडक दिली. ही धडक इतकी भीषण होती की, त्याच वेळी पाठीमागून येणारी एक खाजगी ट्रॅव्हल्स बस देखील या अपघातग्रस्त वाहनांवर येऊन आदळली. तीनही वाहनांची एकमेकांना जोरदार धडक बसल्याने महामार्गावर एकच आक्रोश निर्माण झाला.

अपघाताची माहिती मिळताच महामार्ग पोलीस आणि स्थानिक नागरिकांनी तातडीने घटनास्थळी धाव घेतली. अपघातातील 5 ते 6 जखमींना तातडीने जवळच्या शासकीय रुग्णालयात उपचारासाठी दाखल करण्यात आले असून काहींची प्रकृती चिंताजनक असल्याचे सांगितले जात आहे. या भीषण अपघातामुळे मुंबई-आग्रा महामार्गावरील वाहतूक काही काळासाठी पूर्णपणे विस्कळीत झाली होती. घटनेची गांभीर्य लक्षात घेऊन पोलिसांनी अपघातग्रस्त वाहने रस्त्यावरून बाजूला करण्याचे काम युद्धपातळीवर सुरू केले आहे, जेणेकरून वाहतूक पूर्ववत करता येईल. महामार्ग पोलीस या प्रकरणाचा पुढील तपास करत आहेत.