Kalyan Crime: कल्याणमध्ये वाहतूक पोलिसावर हल्ला, २ तरुणांकडून रक्त येईपर्यंत बेदम मारहाण

Summary -

• कल्याणमध्ये वाहतूक पोलिसावर हल्ला

• दोन तरुणांकडून बेदम मारहाण

• पोलिस जखमी झाला असून त्याच्यावर उपचार सुरू आहेत

• दोन्ही आरोपींवर गुन्हा दाखल करण्यात आला

संघर्ष गांगुर्डे,कल्याण

कल्याणमध्ये वाहतूक पोलिसाला शिवीगाळ करत बेदम मारहाण करण्यात आली आहे. कल्याण पूर्वेतील नांदिवली तर्फ परिसरात ही घटना घडली. या परिसरातील मुख्य वर्दळीच्या रस्त्यावर वाहतूक सुरळीत करण्याचा प्रयत्न करत असताना दोन तरुणांनी वाहतूक पोलिसाला रक्त येईपर्यंत मारहाण केली. या घटनेमुळे परिसरात खळबळ उडाली असून पोलिसांवरील वाढत्या हल्ल्यांबाबत चिंता व्यक्त केली जात आहे. या प्रकरणी नागरिकांनी संताप व्यक्त केला.

संबंधित वाहतूक पोलिस नांदिवलीच्या तर्फ परिसरात वाहतूक कोंडी सोडवण्यासाठी रस्त्यावर कार्यरत होते. यावेळी त्यांनी एका कारमधील दोन व्यक्तींना वाहन बाजूला घेण्यास सांगितले. मात्र, याचा राग आल्याने त्या दोघांनी पोलिसाला शिवीगाळ करत ठोशाबुक्क्यांनी मारहाण केली. या घटनेत देविदास गोपाळ वाघेरे हे वाहतूक पोलिस जखमी झाले आहेत. ते कोळसेवाडी वाहतूक शाखेत कार्यरत आहेत. जखमी पोलिसावर उपचार करण्यात आले असून त्यांची प्रकृती स्थिर असल्याची माहिती आहे.

या प्रकरणी वाहतूक पोलिस देविदास गोपाळ वाघेरे यांच्या तक्रारीवरून कोळसेवाडी पोलिस ठाण्यात सागर जगन्नाथ साळुंखे आणि आतिष दहातोंडे या दोन तरुणांच्या विरोधात शासकीय कामात अडथळा निर्माण करणे तसेच मारहाण केल्याप्रकरणी गुन्हा दाखल करण्यात आला आहे. पुढील तपास कोळसेवाडी पोलिसांकडून सुरू आहे. दोन्ही तरुणांना पोलिसांनी ताब्यात घेतले असून त्यांची चौकशी केली जात आहे. या दोघांविरोधात कठोर कारवाईची मागणी केली जात आहे.