उद्धव ठाकरेंना सांगा इकडे या, आणि....; मग समजेल खरी शिवसेना कुणाची, शहाजीबापू पाटील कडाडले

मुंबई : राज्यात सत्तांतर झाल्यापासून मुख्यमंत्री एकनाथ शिंदे आणि शिवसेना पक्षप्रमुख उद्धव ठाकरे यांच्यात राजकीय संघर्ष सुरु आहे. शिवसेना नेमकी कुणाची? हा तिढा सर्वोच्च न्यायालयात प्रलंबित असतानाचा आज दसरा मेळाव्याच्या निमित्तान ठाकरे गट आणि शिंदे गटाची तोफ धडाडली.

गेल्या काही दिवसांपासून लाखोंच्या संख्येत कार्यकर्त्यांची गर्दी जमवण्यासाठी दोन्ही गटांनी जय्यत तयारी केली. महाराष्ट्राची खरी शिवसेना कुणाची, याचा दाखला आता द्यावा लागणार आहे. उद्धव ठाकरेंना सांगा इकडे या आणि ही गर्दी बघा. त्यानंतर ठरवा ही शिवसेना कुणाची आहे, असा हल्लाबोल शिंदे गटातील आमदार शहाजीबापू पाटील यांनी दसरा मेळाव्यात उद्धव ठाकरे यांच्यावर केला.

आज गद्दारी म्हणतात. महाराष्ट्राने त्यावेळी तुम्हाला शाबासकी दिली, असं तुम्हाला समजायचंय का? भाजपचे देवेंद्र फडणवीस यांच्यासोबत तुम्ही युती तोडली आणि कॉंग्रेस-राष्ट्रवादीसोबत गेले आणि आम्हाला गद्दार म्हणतात. अडीच वर्षात तुम्ही हिंदूहृदयसम्राट बाळासाहेबांच्या विचारांचं खच्चीकरण केलं.

राष्ट्रवादीने गेल्या अडीच वर्षात आम्हाल उकीरड्यावर फेकलं. हे पाप उद्धव साहेब तुम्ही केलं. हे पाप धुवण्याचं काम मुख्यमंत्री एकनाथ शिंदे यांनी केलं. एकनाथ शिंदे जिंदाबाद, एकनाथ शिंदे आगे बढो, हम तुम्हारे साथ है, तळागाळातील कार्यकर्त्यांचा हुंकार आहे.