नर्सची निर्घृण हत्या, विहिरीत आढळला मृतदेह; त्या 'कॉल'ने बिंग फुटलं अन् प्रियकरानेही उचलले टोकाचं पाऊल

अजय सोनवणे, साम टीव्ही

नाशिक जिल्ह्यातील निफाड तालुक्यात २४ दिवसांपासून बेपत्ता असलेल्या महिलेचा मृतदेह जुना देवपूर रस्त्यालगत असलेल्या विहिरीत आढळून आल्याने परिसरात खळबळ उडाली आहे. अनैतिक प्रेम संबंध आणि पैशांच्या देवाणघेवाणीच्या वादातून हा खून झाल्याचा प्राथमिक संशय पोलिसांनी व्यक्त केला आहे. रंभाबाई आनंदा काळे (वय ६०, रा. मामलेदार चौक, निफाड) या स्थानिक रुग्णालयात काम करत होत्या. त्या बेपत्ता झाल्याची तक्रार त्यांचा भाचा प्रवीण घायाळ यांनी २४ फेब्रुवारी रोजी निफाड पोलीस ठाण्यात दाखल केली होती. तपासादरम्यान पोलिसांनी तांत्रिक विश्लेषण आणि मोबाईल सीडीआरच्या आधारे संशयित अरुण बाजीराव ढेपले (वय ४५) याला ताब्यात घेतले.

चौकशीत त्याने महिलेचा खून करून मृतदेह विहिरीत टाकल्याची कबुली दिल्याची माहिती पोलिसांनी दिली यानंतर पोलिसांनी घटनास्थळी शोधमोहीम राबवून रविवारी सायंकाळी विहिरीतून मृतदेह बाहेर काढला दरम्यान, संशयिताने विष प्राशन करून आत्महत्येचा प्रयत्न केला असून त्याच्यावर खासगी रुग्णालयात उपचार सुरू आहेत. या प्रकरणी निफाड पोलीस ठाण्यात गुन्हा नोंदवण्याची प्रक्रिया सुरू असून पुढील तपास पोलीस निरीक्षक गणेश गुरव करत आहेत.

मनमाड-इंदूर रेल्वे मार्गासाठी रेल्वे प्रशासनाने जमीन अधिग्रहण प्रक्रिया सुरु

दरम्यान महाराष्ट्र आणि मध्य प्रदेशातील जनतेसाठी अत्यंत महत्त्वाचा ठरणारा, गेल्या काही वर्षांपासून रखडलेला मनमाड-इंदूर रेल्वे मार्ग प्रकल्प आता गती घेताना दिसत आहे. रेल्वे प्रशासनाने जमीन अधिग्रहण प्रक्रियेला सुरुवात केली असून त्याअंतर्गत आज मनमाडच्या गर्डरशॉप परिसरातील रेल्वे लाईनलगतच्या वसाहतीतील घरांच्या जमिनींचे मोजमाप करण्यात आले.

जमीन मोजमापासाठी स्थानिक नागरिकांनी विरोध दर्शवला होता. संपूर्ण जमीन खरेदी करावी, अशी मागणी यापूर्वी दोन वेळा करण्यात आली होती. त्यामुळे मोजमाप प्रक्रिया थांबवण्यात आली होती. मात्र आज कडक पोलीस बंदोबस्तात भूमी अभिलेख विभागाने नागरिकांच्या विरोधाला न जुमानता मोजमाप प्रक्रिया सुरू केली. एकूण 309.43 किलोमीटर लांबीच्या या रेल्वे मार्गामुळे महाराष्ट्र आणि मध्य प्रदेशातील जनतेसोबतच व्यापाऱ्यांनाही मोठा फायदा होणार आहे.