Maharashtra weather : पावसाची उघडीप, किमान तापमानात घट, कसं असेल आजचे वातावरण

Weather Forecast News in Marathi : सध्या अवकाळी पावसाने उघडीप घेतली आहे, त्यामुळे राज्याच्या किमान आणि कमाल तापमान घट होत आहे. मागील चार दिवसांत राज्यात तुरळक ठिकाणी वादळी पावसाने हजेरी लावली. त्यामुळे शेतकऱ्यांचं मोठं नुकसान झालं होतं. पण आता राज्यातील किमान तापमानात पुन्हा घट होण्याचा अंदाज हवामान विभागाने वर्तविला आहे.

आजपासून ढगाळ वातावरण लक्षणीय प्रमाणात कमी होईल. त्यामुळे स्वच्छ आकाशाखाली पृथ्वीच्या पृष्ठभागावरून दीर्घतरंगीय किरणोत्सर्ग अधिक प्रमाणात होईल. यामुळे स्वाभाविकच रात्रीच्या तापमानात तसेच पहाटेच्या सुमारास नोंदवले जाणाऱ्या किमान तापमानात टप्प्याटप्प्याने घट होईल. आज (ता. १७) राज्यात ढगाळ हवामानासह कमाल तापमानात चढ- उतार होण्याची शक्यता आहे. तर किमान तापमानात २ ते ३ अंशांची घट होण्याचा अंदाज हवामान विभागाने वर्तविला आहे.

नैर्ऋत्य बंगालच्या उपसागरापर्यंत हवेचा कमी दाबाचा पट्टा सक्रिय झालाय. त्यामुळे राज्याच्या किमान आणि कमाल तापमानात घट होण्यास सुरुवात होईल. शनिवारी धुळ्यात सर्वात कमी तापमानाची नोंद झाली. धुळ्यात शनिवारी १३.६ अंश तापमानाची नोंद झाली. विदर्भातील ब्रह्मपुरी येथे किमान तापमान १५ अंशांवर होते. उर्वरित राज्याच्या किमान तापमानात चढ उतार पाहायाला मिळाली.

हवामान विभागाच्या अंदाजानुसार, राज्यात आजपासून ढगाळ वातावरण नाहीसे होण्यास सुरुवात होईल. पुढील काही दिवसांत राज्यात थंडीचे प्रमाण वाढण्याची शक्यता आहे. सध्या उत्तर महाराष्ट्रात कडाक्याची थंडी आहे. नोव्हेंबर अखेरपर्यंत राज्यभरात थंडी येईल.