म्हाडा भूखंड घोटाळा प्रकरणावरून राजकारण फिरलं? दिग्गज नेत्याची विधानपरिषद निवडणुकीतून अचानक माघार, बंद दाराआड काय ठरलं?

गेल्या आठ दिवसांपासून नाशिकच्या राजकीय वर्तुळात सुरू असलेल्या हायव्होल्टेज 'पॉलिटिकल ड्रामा'वर अखेर पडदा पडलाय. भाजपचे बंडखोर नेते गोकुळ गीते यांनी आपली उमेदवारी मागे घेतल्याने शिदेंसेनेचे उमेदवार नरेंद्र दराडे यांना मोठा दिलासा मिळालाय. भाजपचे संकटमोचक गिरीश महाजन आणि उद्योगमंत्री उदय सामंत यांनी थेट गित बंधूंचं घर गाठलं. आणि गिते बंधू आणि दराडे बंधूंना समोरासमोर बसवून तब्बल तासभर चर्चा केली. त्यानंतर गोकुळ गीतेंनी माघार घेत महायुतीचे अधिकृत उमेदवार नरेंद्र दराडे यांना पाठिंबा जाहीर केलाय. मात्र, गीतेंच्या या माघारीमागे महायुतीचं 'दबावतंत्र' असल्याची चर्चा रंगली.

मंत्री गिरीश महाजन जरी म्हाडाच्या नोटीशीचा संबंध नाकारत असले, तरी पडद्यामागे काहीतरी वेगळंच शिजल्याची चर्चा आहे. 1 जूनला गोकुळ गीते आणि गणेश गीते यांनी उमेदवारी अर्ज दाखल केला. आणि त्याच दिवशी, राज्य सरकारच्या कायदेशीर सल्लागार सहसचिवांचे एक पत्र समोर आलं. ज्यामध्ये नाशिकच्या म्हाडा प्रकरणात गणेश गीते यांना उच्च न्यायालयानं मंजूर केलेला अटकपूर्व जामीन रद्द करण्यासाठी तातडीने सुप्रीम कोर्टात जाण्याच्या लेखी सूचना अतिरिक्त सरकारी वकीलांना देण्यात आल्या. त्यामुळे गिते बंधूंवर माघारीसाठी दबाव टाकल्याची चर्चा रंगली. नाशिकचा तिढा मिटला असला तरी जळगावमध्ये मात्र शिंदेसेनेच्या रेश्मा काळे या निव़डणूक लढण्यावर ठाम आहेत.

महायुतीच्या ६ जागा बिनविरोध निवडून आल्या आहेत. तर नाशिकच्या जागेवर आता केवळ विजयाची औपचारिका बाकी आहे. मात्र जळगावच्या जागेचा तिढा सोडवण्यात महायुतीच्या नेत्यांना यश येणार का? याकडे लक्ष लागलंय.