Maratha Reservation : मराठा समाजाला ओबीसीतून आरक्षण नको, त्यांना वेगळ्या प्रवर्गातून आरक्षण द्या - मुधोजी राजे भोसले

पराग ढोबळे, साम टीव्ही, प्रतिनिधी

Maratha Reservation Protest : मराठा समाजाला ओबीसीतून आरक्षण नको आहे. मराठा समाजाला वेगळ्या प्रवर्गातून आरक्षण द्या, अशी मागणी नागपूरच्या भोसले घराण्याचे वंशज मुधोजी राजे भोसले यांनी केली आहे. ओबीसीमधून मराठा समाजाला आरक्षण देण्यास आम्ही विरोध करतो असे वक्तव्य देखील मुधोजी राजे भोसले यांनी केले आहे.

मराठा समाजाला शिक्षण आणि नोकरीत आरक्षण हवे आहे. त्यासाठी ओबीसीमधून आरक्षण देण्याचा काहीच गरज नाही. मराठा समाजाला वेगळ्या प्रवर्गातून आरक्षण द्यावे अशी भूमिका मुधोजी राजे भोसले यांनी स्पष्ट केली आहे. मराठा आरक्षणाच्या लढ्यासाठी त्यांनी मनोज जरांगे पाटील यांना शुभेच्छा देखील दिल्या आहेत.

मराठा आरक्षणावरुन राज्यात राजकारण तापले आहे. मराठा आरक्षणासाठी मनोज जरांगे पाटील हजारो आंदोलनकर्त्यांसह मुंबईत दाखल झाले. त्यांच्या आंदोलनामुळे मुंबईतील छत्रपती शिवाजी महाराज टर्मिनस स्टेशन, चर्चगेट स्टेशन अशा वेगवेगळ्या ठिकाणी मोठ्या प्रमाणात मराठा समाजाच्या आंदोलकांची गर्दी झाल्याचे पाहायला मिळत आहे.

जोपर्यंत मराठा समाजाला आरक्षण मिळत नाही तोपर्यंत हलणार नाही, असा निर्धार मनोज जरांगे पाटील यांनी केला आहे. आमची सरकारचा एकच विनंती आहे. मराठा आणि कुणबी एकच आहेत असा जीआर काढा, हैदराबाद गॅझिटीयर लागू करा, त्याची अंमलबजावणी करा. आमच्या सगळ्या मागण्या मान्य होईपर्यंत आम्ही मुंबई सोडून जाणार नाही, असा इशारा देखील जरांगे पाटील यांनी दिला आहे.