Maharashtra Politics : ठाकरे गटाला मोठा झटका, मोठ्या नेत्यांचा शिवसेना शिंदे गटात प्रवेश

विकास काटे, साम टीव्ही, प्रतिनिधी

Maharashtra : स्थानिक स्वराज्य संस्थांच्या निवडणुका लवकरच जाहीर होतील असे म्हटले जात आहे. या पार्श्वभूमीवर सर्वच पक्षांनी निवडणुकांसाठी तयारी सुरु केली आहे. मोर्चेबांधणी सुरु असताना शिवसेना ठाकरे गटाला धक्का बसल्याची माहिती समोर आली आहे. उल्हासनगरचे ठाकरे गटातील नेत्यांनी शिंदे गटात प्रवेश केला आहे.

मिळालेल्या माहितीनुसार, महानगरपालिका निवडणुका होण्यापूर्वी उद्धव बाळासाहेब ठाकरे गटातील दोन माजी नगरसेवक यांनी शिवसेना शिंदे गटामध्ये प्रवेश केला आहे. उल्हासनगर महापालिकेचे माजी नगरसेवक शेखर यादव आणि माजी नगरसेविका संगीत सपकाळे यांचा आज (२९ ऑगस्ट) ठाणे येथील कार्यक्रमात पक्षप्रवेश झाला.

शिवसेना शिंदे गटाचे प्रमुख एकनाथ शिंदे यांच्या उपस्थितीमध्ये दोन्ही नगरसेवकांसह अनेक पदाधिकारी, कार्यकर्त्यांनी शिंदे गटात प्रवेश केला. यामुळे उल्हासनगरमध्ये ठाकरे गटाला मोठा धक्का बसला आहे, तर दुसऱ्या बाजूला शिंदे गटाची ताकद वाढल्याचे पाहायला मिळत आहे. निवडणुकांपूर्वी राज्यामध्ये ठाकरे गटाला गळती लागल्याचे म्हटले जात आहे.

पक्षप्रवेशाच्या वेळी एकनाथ शिंदे यांनी पत्रकारांशी संवाद साधला. 'शिवसेना शब्द पाळते, विकास हा अजेंडा आहे, त्यामुळे नगरसेवकांनी पक्षात प्रवेश केला. नगरसेवक, पदाधिकारी बाळासाहेब ठाकरे आणि आनंद दिघे यांचे विचार घेऊन येत आहे. त्यांनी श्रीकांत शिंदे यांनी केलेले काम पाहिले आहे, त्यांचे विकास प्रकल्प पाहिले आहेत', असे उपमुख्यमंत्री एकनाथ शिंदे म्हणाले.