Weather Update : सप्टेंबरमध्ये पाऊस कोसळणार? हवामान खात्याचा धडकी भरवणारा इशारा

IMD Weather Update : यंदा पावसाळा लवकर सुरु झाला, जून महिन्यामध्येच पावसाची सुरुवात झाली. जून महिन्यामध्ये झालेल्या पावसाच्या २३ टक्के अधिक पाऊस सप्टेंबर महिन्यामध्ये पडू शकतो, अशी शक्यता हवामान खात्याने वर्तवली आहे. हवामान मॉडेल्सनुसार, सप्टेंबर २०२५ मध्ये मोठ्या प्रमाणात मुसळधार पाऊस पडणार असल्याचे म्हटले जात आहे.

भारतीय हवामान खात्याच्या विस्तारित श्रेणी अंदाजानुसार, ४ सप्टेंबरपर्यंत उत्तर, पश्चिम आणि मध्य भारतातील अनेक भागांमध्ये सामान्यपेक्षा जास्त पाऊस पडणार असल्याची शक्यता आहे. त्यातही १८ सप्टेंबरपर्यंत मुसळधार पाऊस पडू शकतो असे संकेत आहेत. नैऋत्य मान्सून हंगामाच्या दुसऱ्या सहामाहीत (ऑगस्ट आणि सप्टेंबर महिन्यात) देशात दीर्घ कालावधीच्या सरासरीच्या १०६ टक्क्यांहून अधिक पाऊस पडण्याची शक्यता आहे, असे ३१ जुलै रोजी हवामान खात्याने म्हटले होते. ऑगस्टमध्ये सामान्य आणि सप्टेंबरमध्ये सामान्यपेक्षा जास्त पाऊस पडेल, असे अंदाज हवामान खात्याने वर्तवला होता.

पुढील दोन ते तीन दिवसांमध्ये उत्तर भारतामध्ये आणखी पाऊस पडेल. सध्या काही ठिकाणी मुसळधार पाऊल पडत आहे. या ठिकाणी देखील पावसाची तीव्रता वाढेल. त्यानंतर मध्य भारतातही मुसळधार पाऊस सुरु राहील. पुढील १० दिवसांमध्ये देशात चांगला पाऊस पडणे अपेक्षित आहे, असे हवामान पृथ्वी विज्ञान मंत्रालयाचे माजी सचिव एम राजीवन यांनी म्हटले आहे.

जम्मू-काश्मीर, हिमाचल प्रदेश आणि पंजाबच्या अनेक भागांमध्ये अतिवृष्ठी झाली आहे. उत्तरेकडील अनेक नद्या पूरग्रस्त झाल्या आहेत. जम्मू-काश्मीर आणि हिमाचल प्रदेशात पावसाची तीव्रता पश्चिमी विक्षोभ आणि मान्सूनच्या वाऱ्यांमुळे वाढत आहे. असे आयएमडीचे महासंचालक एम महापात्रा यांनी सांगितले. या भागात पावसाची तीव्रता कमी होण्यास लवकरच सुरुवात होईत. त्यानंतर देशाच्या उत्तर, मध्य आणि पश्चिम भागात पाऊस सुरुच राहील. ३ सप्टेंबरच्या सुमारास मुसळधार पावसाला सुरुवात होईल, अशी माहिती महापात्रा यांनी दिली.