Maratha Reservation: पैसे नाहीत, सकाळपासून उपाशी आहे ...आम्हाला घरी जायचंय! हिंसक आंदोलनानंतर बीडची बससेवा ठप्प

Maratha Reservation

बीडमध्ये मराठा आरक्षणाच्या आंदोलनाला हिंसक वळण लागल्यानंतर बीडमधील बससेवा ठप्प झाली आहे. शेकडो बस बसस्थानकातच थांबून असल्यामुळे प्रवाशांचे मोठे हाल होत आहेत. अनेक प्रवाशी बसस्थानकात तर काही प्रवाशी बसमध्येच अडकून पडले आहेत.

मराठा आरक्षणावर सरकार कोणताच निर्णय घेत नसल्यामुळे मनोज जरांगे पाटील जालण्यात आमरण उपोषणाला बसले आहेत. राज्यात ठिकठिकाणी आंदोलनं सुरू आहेत. दरम्यान बीडमध्ये हिंसक वळण लागल्यानंतर रात्री बस पेटवून देण्यात आली होती. आज सकाळी पुन्हा एक बस फोडण्यात आली आहे. त्यामुळे बस वाहतूक बंद करण्यात आली आहे. शेकडो बस बसस्थानकात उभ्या आहेत आणि त्यामुळे आता प्रवाशांचे मोठे हाल सुरू झाले आहेत.('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

आम्ही आज सकाळी संभाजीनगरवरून बसमध्ये बसलो. मात्र बीड शहरात येण्यापूर्वी रास्ता रोको आंदोलन सुरू होते. त्याठिकाणी बस अर्धा ते पाऊण तास थांबवली. त्यानंतर बीड शहरातील बस स्थानकात आलो. मात्र आता पाच ते सहा तासांपासून इथंच आहोत. खिशात पैसे नाहीत, सकाळपासून उपाशी आहोत, आता आम्ही जायचं कसं ? असा सवाल संभाजीनगरवरून मुखेडला जाणाऱ्या प्रवाशांनी केला आहे.