मालेगाव महापालिकेत पुन्हा राडा; इस्लाम आणि MIM च्या नगरसेवकांची एकमेकांना धक्काबुक्की

अजय सोनवणे, साम टीव्ही

नाशिकमधील मालेगाव महापालिकेत महासभेत पुन्हा एकदा गोंधळ झाला आहे. दोन पक्षाचे नगरसेवक आमनेसामने आले आहेत. इस्लाम पक्ष आणि MIM नगरसेवकांमध्ये तीव्र बाचाबाची होऊन धक्काबुक्की झाली. नगरसेवकांच्या धक्काबुक्कीमुळे सभागृहात तणावाचे वातावरण निर्माण झालं.

मालेगाव महापालिकेच्या महासभेत SIR मुद्द्यावरून मोठा गोंधळ निर्माण झालाय. SIR मुद्द्यावरून इस्लाम पक्ष आणि MIM नगरसेवकांमध्ये जोरदार बाचाबाची झाली. दोन्ही गटातील वाद इतका वाढला की, काही नगरसेवक एकमेकांवर धावून गेले. त्यामुळे दोन्ही गटाच्या नगरसेवकांमध्ये धक्काबुक्की झाली. या गोंधळामुळे काही काळ पालिकेच्या महासभेचे कामकाज ठप्प झाले.

काही दिवसांपूर्वी नगरसेवकांमध्ये झाला होता राडा

काही दिवसांपूर्वी देखील मालेगाव महापालिकेत गोंधळ पाहायला मिळाला होता. अर्थसंकल्प सादर करण्याच्या दिवशी महासभा शाब्दिक चकमकीमुळे तणाव निर्माण झाला. सत्ताधारी इस्लाम पार्टी आणि एमआयएमच्या नगरसेवक एकमेकांच्या विरोधात भिडले होते. घरपट्टीच्या मुद्द्यावरून गोंधळ झाला होता. दोन्ही गटाचे नगरसेवक आक्रमक झाल्याने गोंधळाचे वातावरण निर्माण झाले होते.

यावेळी सभागृहात एमआयएमचे गटनेते अब्दुल मालिक आणि महापौर पती खालिद हाजी यांच्या शा‍ब्दिक चकमक पाहायला मिळाली. दोन्ही बाजूंचे नगरसेवक एकमेकांच्या अंगावर धावून गेले होते. काही काळ सभागृहात घोषणाबाजी आणि गोंधळ सुरू होता. त्यानंतर काही वेळासाठी कामकाज ठप्प झालं होतं. त्यानंतर ज्येष्ठ नगरसेवकांनी वाद मिटवून परिस्थिती नियंत्रणात आणली होती. त्यानंतर महासभेचे कामकाज पुन्हा सुरू झालं.