नाशिकमध्ये मालगाडीचा भयंकर अपघात, भल्या पहाटे 'मॅजिक'ला उडवले, जागीच चेंदामेंदा

अजय सोनवणे, नाशिक प्रतिनिधी

नाशिकमधील मनमाडमध्ये मालगाडी आणि मॅजिकचा भयंकर अपघात झाला. पहाटेच्या सुमारास रेल्वे मालगाडीने मॅजिक गाडीला जोरदार धडक दिली. ही धडक इतकी भयंकर होती की मॅजिक गाडीचा चेंदामेंदा झाला. मिळालेल्या माहितीनुसार, मनमाडच्या गर्डरशॉप येथील रेल्वे लाईनवर हा अपघात झाला. यानंतर परिसरात एकच खळबळ उडाली.

पहाटेच्या सुमारास मालवाहू रेल्वे रॅक एफसीआय धान्य गोडाऊनमध्ये जात होती. त्याच वेळी मॅजिक गाडी गर्डर शॉपमधून येत होती. पण मॅजिक गाडी रेल्वे रुळावर बंद पडली. वेगात असणाऱ्या मालगाडीने मॅजिक गाडीला उडवले. सुदैवाने यात कोणतीही जिवतहानी झाली नाही. मॅजिकमधील चालक आणि दुसरा एक व्यक्ती तात्काळ बाहेर पडले होते. पण मालगाडीच्या धडकेत गाडीचा चेंदामेंदा झाला.

गाडी बंद पडल्याचे दिसताच रेल्वे इंजिन चालकाने गाडी थांबवली. मॅजिकमध्ये असलेल्या दोघांनी गाडी लोटून पुन्हा बाहेर आणली. रेल्वे इंजिन चालक जाण्यासाठी निघाला होता, पण अचानक मॅजिक गाडी उतारावरून पुन्हा रेल्वे रूळावर आली अन् मालगाडीला जोरात धडकली. या अपघातानंतर परिसरात एकच खळबळ उडाली होती. सुदैवाने चालक आणि त्याच्यासोबत असणारा व्यक्ती बचावला.

या अपघातात मॅजिक गाडीचा चेंदामेंदा झाला. सुदैवाने यात कोणालाही दुखापत झाली नाही. या अपघातामुळे मात्र गर्डर शॉप व ग्रामीण भागातून मनमाड शहरात येणाऱ्या नागरिकांचे व वाहन धारकांना ताटकळत रहावे लागले. त्यामुळे नागरिकांकडून नेहमीच संताप व्यक्त केला जात आहे.