Girls School Controversy: महात्मा फुले यांनीच सुरू केली मुलींची शाळा; प्रशांत फुलेंनी उदयनराजेंचा 'तो' दावा खोडला

मुलींची पहिली शाळा थोरले प्रतापसिंह राजे भोसले यांनी सुरू केली. महात्मा फुले यांनी त्यांचे अनुकरण केलं, असा दावा उदयनराजे भोसले यांनी केला होता. मात्र हा दावा खोटा असल्याचं म्हणत प्रशांत फुले यांनी थेट पुरावे सादर करत उदयनराजे यांची चूक निर्दशनात आणून दिली. महात्मा फुलेंनी १८४८ मध्ये मुलींची शाळा काढली होती. तर १८५१ मध्ये बांधण्यात आलेल्या साताऱ्यातील राजवाड्यात 'सातारा हायस्कूल' सुरू करण्यात आल्याची माहिती प्रशांत फुले यांनी दिलीय.

खासदार उदयनराजे भोसले यांचा दावा खोडून काढण्यासाठी प्रशांत फुले यांनी एका वृत्तपत्रातील बातमीचा संदर्भ दिलाय. या वृत्तानुसार, प्रतापसिंह महाराज यांनी १८२४ मध्ये साताऱ्यात राजवाडा बांधला होता. या राजवाड्यात १८५१ मध्ये सातारा हायस्कूल सुरू करण्यात आलं. या हायस्कूलमध्ये भारतीय राज्यघटनेचे शिल्पकार डॉ. बाबासाहेब आंबेडकर यांनी ७ नोव्हेंबर १९०४ रोजी 'भिवा रामजी आंबेडकर' या नावाने प्रवेश घेतला होता.

तर १९५१ मध्ये शतक महोत्सवात शाळेचे नाव 'छत्रपती प्रतापसिंह हायस्कूल' करण्यात आले. तर महात्मा फुले यांनी १ जानेवारी १८४८ साली मुलींची शाळा काढली होती. महात्मा फुलेंनी पुणे, सातारा, अहिल्यानगर या शहरात १८ शाळा सुरू केल्या. त्याआधी शूद्र-अति शू्द्र मुलींसाठी शाळा नव्हत्या. महात्मा फुले यांच्यानंतर १८५१ साली प्रतापसिंह महाराज यांनी सर्व मुलं-मुलींसाठी शाळा सुरू केली.

थोरले प्रतापसिंह महाराज यांनी सुरू केली मुलींची पहिली शाळा - उदयनराजे भोसले

थोरले प्रतापसिंह महाराज यांनी मुलींची पहिली शाळा सुरू केली होती. थोरले प्रतापसिंह महाराज यांचे अनुकरण महात्मा फुलेंनी केलं. त्यानंतर त्यांनी मुलींची शाळा सुरू केली. त्यामुळे स्त्री शिक्षणाची शाळा जर कुणी सुरू केली असेल, तर ती थोरले प्रतापसिंह महाराज. महाराजांनी स्वत:च्या राजवाड्यात शाळा सुरू केली. त्या राजवाड्यात कालांतराने ज्यांनी देशाचं संविधान लिहिलं ते डॉक्टर बाबासाहेब आंबेडकर यांचे प्राथमिक शिक्षण झालं. असं विधान खासदार उदयनराजे भोसले यांनी केलं होतं.

त्यांच्या विधानानंतर वाद रंगला होता. खासदार भोसले यांच्या वक्तव्याचा ओबीसी नेते मंगेश ससाणे यांनी समाचार घेतला. उदयनराजे भोसले यांनी फुलेंच महत्व कमी केलं आणि त्यांच्या पूर्वजांच महत्व वाढवण्यांचे काम केलं असं ससाणे म्हणाले. आता प्रशांत फुले यांनीही वृत्तपत्राच्या लिंक प्रसारित करत खासदार उदयनराजे भोसलेंचा दावा खोडून काढला.