Maharashtra Weather: मुंबईसह उत्तर कोकणाला उन्हाचे चटके; दक्षिण महाराष्ट्रात विजांच्या कडकडाटासह पाऊस, भर उन्हाळ्यात ऊन-पावसाचा खेळ!

दिवसेंदिवस राज्यात उन्हाचा चटका वाढत आहे. वाढत्या उन्हाचा लोकांना मोठा त्रास होतोय. राज्याच्या अनेक भागात तापमानाचा पारा ४० अंशाच्या पुढे गेला आहे. अनेक ठिकाणी उष्णतेची लाट नोंदवण्यात आलीय. मागील २४ ते ४८ तासांमध्ये उत्तर कोकण आणि विदर्भात उष्णतेची लाट आली आहे. अजून दोन दिवस येथील हवामान उष्ण असणार आहे. मात्र दुसरीकडे दक्षिण महाराष्ट्रात विजांच्या कडकडाटासह पाऊस पडणार असल्याचा अंदाज हवामान विभागाने वर्तवलाय.

भर उन्हाळ्यात ऊन-पावसाचा खेळ रंगणार असल्याचा अंदाज हवामान विभागाने वर्तवला आहे. राज्यातील काही भागांमध्ये पाऊस होणार आहे, तर काही भागांमध्ये उन्हाचे चटके बसणार आहेत. पुढील दोन दिवस मुंबई आणि उत्तर कोकण भागात अति उष्ण आणि दमट वातावरण असणार आहे. तसेच विदर्भात उष्णतेचा यलो अलर्ट देण्यात आला आहे.

बहुतांश जिल्ह्यांत तापमान ४० अंशांच्या पुढे जाण्याची शक्यता आहे. पश्चिम विदर्भातील अकोला, अमरावती, यवतमाळ, बुलढाणा, वाशीममध्ये उष्णतेचा तडाखा बसणार आहे. नागपूर, चंद्रपूर आणि वर्धा जिल्ह्यांतही तापमान ४० अंशांच्या आसपास असेन. उत्तर-पश्चिम वाऱ्यामुळे येथील तापमानात वाढ होणार आहे. तर राज्यातील काही भागातील विजांच्या कडकडाटासह पावसाची देखील शक्यता पुणे वेधशाळेनी वर्तवली आहे.

दरम्यान या वाढत्या तापमानाच्या पार्श्वभूमीवर नागरिकांनी योग्य ती काळजी घ्यावी, असं आवाहन प्रशासनाच्या वतीनं करण्यात आले आहे. तर आज गुरुवारी राज्यातील तापमानात मोठी वाढ झाली. तापमानाचा पारा ४० अंशाच्या पुढे गेला आहे. आज अमरावती, अकोला, ब्रह्मपुरी आणि यवतमाळमध्ये उष्णतेची लाट नोंदवण्यात आली आहे. नाशिकमध्ये यंदाच्या मोसमातील सर्वाधिक तापमानाची नोंद झाली आहे. नाशिकचा पारा ३८.५ अंशावर गेलाय. कमाल आणि किमान तापमानात मोठी तफावत आहे. किमान तपमान १६.८ अंश सेल्सिअस आहे.