Heavy rain Maharashtra : वेळेच्या आधीच दाखल झालेल्या मॉन्सूनने मंगळवारी महाराष्ट्र व्यापला आहे. त्यामुळे राज्यात पुढील चार दिवस मुसळधार पावसाची शक्यता वर्तवण्यात आली आहे. भारतीय हवामान विभागाने कोकण आणि मध्य महाराष्ट्रात मुसळधार ते अतिमुसळधार पावसाचा अंदाज वर्तवला आहे. अरबी समुद्रात कमी दाबाचा पट्टा निर्माण झाला आहे, त्यामुळे राज्यात पुढील चार दिवस धो धो पाऊस कोसळण्याची शक्यता आहे. (What is Maharashtra climate condition?)
कोकणातील रायगड, रत्नागिरी आणि सिंधुदुर्ग जिल्ह्यांमध्ये आज आणि उद्या मुसळधार ते अति मुसळधार पाऊस पडेल. २० आणि २१ जून रोजीही या भागात पावसाचा जोर कायम राहण्याची शक्यता आहे. पालघर, ठाणे आणि मुंबईत आज तुरळक ठिकाणी मुसळधार पाऊस अपेक्षित आहे. १९ जून रोजी ठाणे आणि मुंबईत जोरदार सरी कोसळतील, तर २०-२१ जून रोजी पावसाचा जोर कमी होऊन मध्यम पाऊस पडेल.
पुणे आणि सातारा घाटमाथ्यावर पुढील चार दिवस तुरळक ठिकाणी मुसळधार ते अति मुसळधार पाऊस पडण्याची शक्यता आहे. कोल्हापूर घाटमाथ्यावर पुढील दोन दिवस मुसळधार पाऊस, तर २० आणि २१ जून रोजी मध्यम पाऊस अपेक्षित आहे. नाशिक घाटमाथ्यावर आज मुसळधार पाऊस पडेल, त्यानंतर मध्यम पाऊस सुरू राहील.
पुणे, कोल्हापूर आणि सातारा जिल्ह्यांमध्ये पुढील चार दिवस हलका ते मध्यम पाऊस पडेल. नाशिक, धुळे आणि नंदुरबारमध्ये दोन दिवस विजांच्या कडकडाटासह वादळी वारे आणि हलका ते मध्यम पाऊस अपेक्षित आहे. जळगावातही याच काळात वादळी पावसाची शक्यता आहे. अहमदनगर, सांगली आणि सोलापूर जिल्ह्यांमध्ये तुरळक ठिकाणी हलका पाऊस पडेल.
हवामान खात्याने कोकण आणि घाटमाथ्यावरील नागरिकांना सतर्क राहण्याचे आवाहन केले आहे. शेतकऱ्यांना पिकांचे नुकसान टाळण्यासाठी खबरदारी घेण्याचा सल्ला देण्यात आला आहे.
यंदा मान्सूनने विक्रमी वेगाने महाराष्ट्रात प्रवेश केला. २४ मे रोजी केरळ आणि कर्नाटक किनारपट्टीवर दाखल झालेला मान्सून २५ मे रोजी सिंधुदुर्ग आणि २६ मे रोजी मुंबई, पुणे, धाराशीवपर्यंत पोहोचला. २८ मे रोजी मध्य महाराष्ट्र, मराठवाडा आणि विदर्भात प्रगती केली. मात्र, त्यानंतर काही काळ थांबलेला मान्सून पश्चिम बंगाल आणि गुजरातमधील कमी दाब क्षेत्रांमुळे पुन्हा सक्रिय झाला. १७ जून रोजी विदर्भासह संपूर्ण महाराष्ट्र व्यापला आहे.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.