Wedding Turns Tragic : लग्नाच्या आदल्या रात्रीच होणाऱ्या नवऱ्याला संपवलं, नवरी प्रियकरासोबत झाली फरार

Bride murders groom hours before wedding : मागील काही दिवसांत लग्नानंतरच्या हत्या आणि खूनकांडांनी देशात खळबळ उडाली आहे. सोनम आणि राजा प्रकरणाने तर खळबळ उडवली होती. आता लग्नापूर्वीच मुलीने प्रियकरासोबत मिळून होणाऱ्या नवऱ्याचा खून केल्याचा धक्कादायक प्रकार समोर आला आहे. उत्तर प्रदेशातील रामपूरमध्ये ही घटना घडली. लग्नाच्या आदल्या रात्रीच नवऱ्याची हत्या झाली. सोमवारी पोलिसांनी नवरदेवाचा मृतदेह शोधून काढला आणि पोस्टमार्टमसाठी पाठवला. या प्रकरणी नवरी, तिचा प्रियकर आणि त्यांच्या दोन साथीदारांविरुद्ध अपहरण आणि हत्येचा गुन्हा दाखल झाला आहे. पोलिसांचा तपास सुरू आहे.

रामपूरच्या मोहल्ला गूजर येथील ३५ वर्षीय निहाल याचा होणाऱ्या पत्नीने खून केला. निहाल लग्न समारंभात जेवण बनवण्याचे काम करायचा. चार महिन्यांपूर्वी त्याचे धनुपुरातील गुलफशासोबत लग्न ठरले होते. १५ जून २०२५ रोजी त्यांचा विवाह होणार होता. लग्नाची सर्व तयारी पूर्ण झाली होती. हळदीचा समारंभही उत्साहात पार पडला. मात्र, लग्नाच्या आदल्या दिवशी गुलफशाने प्रियकराच्या मदतीने निहालचा काटा काढला. खून करून दोघेही फरार झाले.

लग्नापूर्वी निहालच्या घरी आनंद आणि उत्साहाचे वातावरण होते. १४ जून रोजी निहालला एक फोन आला. नवरीचा चुलत भाऊ असल्याचे सांगून त्याला कपडे खरेदीसाठी बोलावण्यात आले. दोन तरुण दुचाकीवरून त्याला घेऊन गेले. रात्र झाली तरी निहाल घरी परतला नाही, म्हणून कुटुंबीयांनी पोलिसांत धाव घेतली. नातेवाईकांनी गुलफशा आणि तिच्या प्रियकरावर संशय व्यक्त केला. पोलिसांनी सीसीटीव्ही फुटेज तपासले असता दोन संशयित तरुणांची ओळख पटली. चौकशीत आरोपींनी हत्येची कबुली दिली. त्यांच्या माहितीवरून सोमवारी सकाळी अजीमनगर पोलीस ठाण्याच्या हद्दीतील रतनपुरा जंगलातून निहालचा मृतदेह ताब्यात घेण्यात आला. मृतदेहाचे पोस्टमार्टम करण्यात आले.

निहालचा भाऊ नायाब शाह यांच्या तक्रारीवरून गुलफशा, तिचा प्रियकर सद्दाम, फरमान आणि अनीस यांच्याविरुद्ध गुन्हा दाखल झाला आहे. ठाणे प्रभारी पवन कुमार शर्मा यांनी सांगितले की, सद्दाम आणि फरमान यांना अटक झाली आहे, तर गुलफशा आणि अनीस यांचा शोध सुरू आहे.