Maharashtra School: विद्यार्थ्यांसाठी महत्वाची बातमी, शाळांच्या वेळापत्रकात बदल; आता सकाळी ७ ऐवजी...

पहिली ते दहावीच्या विद्यार्थ्यांसाठी महत्वाची बातमी समोर आली आहे. राज्यातील शाळा येत्या १६ जूनपासून सुरू होणार आहे. विद्यार्थ्यांसह पालकांनी शाळा सुरू होण्यापूर्वी तयारी सुरू केली आहे. शाळेसाठी नवीन दप्तर, वॉटर बॉटल, वह्या, पुस्तक खरेदी करणं सध्या सुरू आहे. अशातच शाळांच्या वेळापत्रकाबाबत महत्वाचा निर्णय घेण्यात येण्याची शक्यता आहे. शाळांचे वेळापत्रकात बदल करण्यात येणार असल्याचे बोलले जात आहे. आता शाळा सकाळी ७ ऐवजी ९ वाजता सुरू होऊ शकतात.

पहिलीच्या अभ्यासक्रमात यंदाच्या शैक्षणिक वर्षात बदलला असल्याने शाळांच्या वेळापत्रकांमध्ये मोठ्या प्रमाणात बदल केला जाणार आहे. पहिल्याच्या पाठ्यपुस्तकातील अध्ययन पद्धतीत त्यात झालेले बदल, त्यामुळे अनेक तासिका वाढणार आहे. त्या तासिकाचे नियोजन करणं यासाठी एकूणच शाळांच्या वेळात्रकात बदल केले जाणार असून त्यासाठीच्या मार्गदर्शक सूचना लवकरच जाहीर केल्या जाणार असल्याची माहिती शालेय शिक्षण विभागातील उच्च स्तरावर अधिकार्‍यानेच दिली आहे. यासंदर्भातील मार्गदर्शक सूचनांसाठी मंजूरी मिळालेली आहे, त्याची अंमलबजावणी शाळेच्या पहिल्या दिवसापासून होऊ शकते, असे अधिकाऱ्याने सांगितले.

महाराष्ट्र राज्य बोर्डाच्या शाळांबाबत महत्वाचा निर्णय घेण्यात येणार आहे. शैक्षणिक वर्ष २०२५-२६ ची सुरूवात येत्या १६ जूनपासून होणार आहे. नव्या शैक्षणिक वर्षापासून शाळांच्या वेळापत्रकात बदल होण्याची शक्यता आहे. नव्या शैक्षणिक वर्षामध्ये राज्यातील शाळा सकाळी ७ ऐवजी ९ वाजता भरतील आणि सायंकाळी ४ वाजता सुटतील असे सांगितले जात आहे. पण याबाबतची अधिकृत घोषणा अद्याप करण्यात आलेली नाही.

दरम्यान, राज्यामध्ये लवकरच शाळांच्या घंटा वाजणार आहे. उन्हाळी सुट्ट्या संपत आल्या असून आता लवकरच शाळा सुरू होणार आहे. महाराष्ट्र राज्य बोर्डाच्या शाळा १६ जूनपासून सुरू होणार आहे. तर सीबीएसई बोर्डाची शाळा येत्या ९ जूनपासून सुरू होणार आहे. राज्यातील ११ जिल्हे वगळता सगळीकडे शाळा १६ जूनपासून सुरू होणार आहेत. विदर्भामध्ये इतर विभागांच्या तुलनेत थोड्या उशिराने शाळा सुरू केल्या जातात.