राज्यातील अनेक जिल्ह्यामध्ये मान्सूनपूर्व पाऊस पडत आहे. अनेक ठिकाणी धुवाधार पाऊस पडत आहे. पश्चिम महाराष्ट्र आणि कोकणातील काही जिल्ह्यांमध्ये पावसाची जोरदार बॅटिंग सुरू आहे. या पावसामुळे अनेक ठिकाणी पाणी साचले आहे. मुबंई - गोवा महामार्गावर पाणी साचल्यामुळे वाहनाचालकांना अडचणी येत आहेत. तर अनेक ठिकाणी झाडं कोसळल्याची घटना घडली आहे.
साताऱ्यातील अनेक ठिकाणी मुसळधार पाऊस पडत आहे. पाचगणी, वाई भागात मुसळधार पाऊस पडत आहे. दोन ठिकाणी वीज कोसळली. यामध्ये ४० बकऱ्यांचा मृत्यू झाला आहे. मुसळधार पावसाने पसरणी घाटात वाहनांच्या लांबच लांब रांगा लागल्या आहेत. या पावसामुळे उकाड्यामुळे हैराण झालेल्या नागरिकांना दिलासा मिळाला.
सांगली शहरासह परिसरामध्ये मान्सूनपूर्व पावसाने जोरदार हजेरी लागली आहे. शहरासह अनेक भागांमध्ये दमदार पाऊस पडत आहे. सकाळपासून सांगली शहरांमध्ये उकाडा वाढला होता आणि दुपारनंतर ढगाळ वातावरण होऊन जोरदार पाऊस सुरू झाला. या पावसामुळे नागरिकांची चांगलीच तारांबळ उडाली. तर पाऊस पडत असल्याने शेतकरी वर्ग चांगला सुखावला आहे.
कोल्हापूर जिल्ह्यात अनेक ठिकाणी मुसळधार पाऊस पडत आहे. पेठ वडगाव, कर्ली, पन्हाळा रोड, असुरले पोर्ले मार्गावर तुफान पाऊस पडत आहे. अचानक आलेल्या पावसामुळे नागरिकांची तारंबळ उडाली. दुपारपासून कोल्हापूरमध्ये ढगाळ वातावरण होते. त्यानंतर मुसळधार पावसाला सुरुवात झाली.
पुणे जिल्ह्यातील आळंदी खेड परिसरात आज दुपारच्या सुमारास विजांच्या कडकडाटासह मुसळधार पाऊस झाला. यावेळी अंगावर वीज पडून शेतमजूराचा दुदैवी मृत्यू झालाय. ओंकार ठाकर असे शेतमजूराचे नाव आहे.
रत्नागिरीमध्ये मुबंई - गोवा महामार्गावर पहिल्याच रिमझिम पावसात पाणी साचलंय. या साचलेल्या पाण्यातूनच वाहनधारकांना आपली वाहनं घेऊन जावी लागत आहेत. मुबंई- गोवा महामार्गावर लोटे या ठिकाणी महामार्गावर पाणी साचले आहे. या पावसामुळे उकाड्याने हैराण झालेल्या रायगडकरांना दिलासा मिळाला.
रायगडच्या दक्षिण भागात दुपारी मान्सूनपूर्व पावसाने हजेरी लावली असून महाड, माणगाव शहरांबरोबरच ग्रामीण भागातही पावसाच्या सरी बरसल्या. या पावसामुळे उकाड्याने हैराण नागरिकांना मोठा दिलासा मिळाला. पाऊस पडण्याचा अंदाज हवामान विभागानेही वर्तवला असून आज सकाळ पासूनच जिल्ह्यात ढगाळ वातावरण होते.
आज दुपारी नांदेड जिल्हा आणि परिसरात मान्सून पूर्व पावसाने दमदार हजेरी लावली. वादळी वाऱ्यासह पडलेल्या पावसामुळे नांदेड न्यायालयाच्या गेट समोर झाड कोसळले.विद्युत पुरवठा करणाऱ्या तारांवर हे झाड कोसळल्याने न्यायालय परिसरातील विद्युत पुरवठा खंडित झाला आहे. पार्किंगमध्ये लावलेल्या काही दुचाकींनवर देखील हे झाड कोसळल्याने दुचाकींचे नुकसान झाले.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.