Sangli Loksabha News: पठ्ठ्याने करुन दाखवलं ! सांगलीच्या खासदारकीचा 'चंद्रहार' विशाल पाटलांच्या गळ्यात

विजय पाटील, सांगली, ता. ४ जून २०२४

देशासह राज्याकील लोकसभा निवडणुकांची मतमोजणी सुरू आहे. संपूर्ण राज्याचे लक्ष लागून राहिलेल्या सांगली लोकसभा मतदार संघातील तिरंगी लढतीचा अंतिम निकाल समोर आला आहे. सांगलीच्या हायहोल्टेज लढतीत यांनी विशाल पाटील यांनी बाजी मारली असून 1लाख 1 हजार 94 मतांनी मतांनी विजय मिळवत सांगलीची खासदारकी मिळवली आहे.

सांगलीचा खासदार ठरला!

महाविकास आघाडीमध्ये झालेल्या उमेदवारीच्या कुरघोडीवरुन गाजलेल्या सांगली लोकसभेचा अंतिम निकाल आता समोर आला आहे. महायुतीकडून संजय काका पाटील, महाविकास आघाडी पुरस्कृत ठाकरे गटाचे उमेदवार महाराष्ट्र केसरी पैलवान चंद्रहार पाटील आणि काँग्रेसचे बंडखोर अपक्ष उमेदवार विशाल पाटील यांच्यामध्ये झालेल्या या तिरंगी लढतीत विशाल पाटील यांनी बाजी मारुन सर्वांनाच धक्का दिला आहे.

तिरंगी अन् चुरशीची लढत!

तत्पुर्वी सांगली लोकसभेत उमेदवारीवरुन महाविकास आघाडीत हायहोल्टेज ड्रामा पाहायला मिळाला. शिवसेना ठाकरे गटाने कोणतीही चर्चा न करता थेट डबल महाराष्ट्र केसरी पैलवान चंद्रहार पाटील यांना उमेदवारी घोषित केली. ठाकरेंच्या या कुरघोडीने काँग्रेसमध्ये प्रचंड नाराजी पसरली होती. काँग्रेसकडून लोकसभा निवडणूक लढण्यास इच्छुक असलेल्या विशाल पाटील यांनी अखेर बंडाचा झेंडा फडकावत पक्षश्रेष्ठींच्या मनधरणीला न जुमानता अपक्ष उमेदवारी अर्ज दाखल केला होता.

या बंडखोरीमुळे सांगलीत संजय काका पाटील, चंद्रहार पाटील आणि विशाल पाटील यांच्यामध्ये तिरंगी लढत झाली. त्यामुळेच अत्यंत चुरशीची आणि अटीतटीच्या या लढतीत सांगली लोकसभेचा चंद्रहार कोणाच्या गळ्यात पडणार? याबाबत सर्वांनाच उत्सुकता होती. अखेर या लढतीत विशाल पाटील यांनी बाजी मारत सर्वांनाच धक्का दिला आहे.