पुणे पोर्शे कार अपघात प्रकरणातील (Pune Porsche Car Accident) आरोपी मुलाच्या ब्लड रिपोर्टमध्ये फेरफार प्रकरणात मोठी अपडेट समोर आली आहे. मुंबईतून अटक करण्यात आलेल्या दोघांनाही न्यायालयाने ६ दिवसांची पोलिस (Pune Police) कोठडी सुनावली आहे. अश्फाक मकानदार आणि अमर गायकवाड यांना १० जूनपर्यंत पोलिस कोठडी सुनावण्यात आली आहे. पुणे पोलिसांच्या गुन्हे शाखेने मुंबईतून मंगळवारी या दोघांना अटक केली होती.
पुणे कल्याणीनगर अपघात प्रकरणातील आरोपी मुलाच्या ब्लड रिपोर्टमध्ये फेरफार प्रकरणात नवनवीन अपडेट समोर येत आहेत. ब्लड रिपोर्टमध्ये फेरफार केल्याप्रकरणी पुणे पोलिसांनी काही दिवसांपूर्वी ससून रुग्णालयाचे दोन डॉक्टर, शिपायी आणि आरोपी मुलाची आई शिवानी अग्रवालला अटक केली होती. या सर्वांच्या चौकशीमध्ये आणखी दोघांची नावं समोर आली. याप्रकरणी पुणे पोलिसांनी अश्फाक मकानदार आणि अमर गायकवाड यांना मुंबईतून अटक केली.
मुंबईतून अटक करण्यात आलेल्या या दोघांचा रक्ताचे नमुने बदलण्यात हात होता. अटकेनंतर या आरोपींना आज कोर्टामध्ये हजर करण्यात आले होते. कोर्टाने त्यांना १० जूनपर्यंत पोलिस कोठडी सुनावली आहे. ब्लड रिपोर्ट फेरफार करण्यासाठी ससून रुग्णालयातील डॉक्टरांना या दोघांनी ३ लाख रुपये दिले होते, अशी माहिती समोर आली आहे.
दरम्यान, या प्रकरणातील आरोपी मुलाची आई शिवानी अग्रवालवर रक्ताचे नमुने बदलण्यासाठी कट रचल्याचा पोलिसांना संशय होता. याप्रकरणी पोलिसांनी शिवानी अग्रवालला चौकशीसाठी ताब्यात घेतले होते. चौकशीदरम्यान शिवानी अग्रवालने मुलाच्या रक्ताच्या नमुन्याऐवजी माझ्या रक्ताचे नमुने दिले असल्याची कबुली दिली होती. त्यानंतर पोलिसांनी शिवानी अग्रवालला अटक केली. शिवानी अग्रवाल सध्या पोलिस कोठडीत आहे. याप्रकरणात अल्पवयीन मुलाचे वडील, आजोबा, आई, ससून रुग्णालयाचे दोन डॉक्टर, शिपायी अटकेत आहेत. आता आणखी दोघांना अटक झाली आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.