Maharashtra Politics: विमानापेक्षा इमान महत्वाचा...; ठाकरे-फडणवीसांच्या एकत्र विमान प्रवासावरून शिंदे संतापले

• ठाकरे आणि फडणवीस यांच्या एकत्र विमान प्रवासावरून राजकारण तापले

• एकनाथ शिंदेंकडून विमान प्रवासावर सडकून टीका

• शिंदेंनी 'विमानापेक्षा इमान महत्त्वाचे' अशी टीका केली

• ठाकरे यांच्या सभांनाही शिंदेंनी खोचक शब्दांत लक्ष्य केले

उद्धव बाळासाहेब ठाकरे पक्षाचे प्रमुख उद्धव ठाकरे आणि मुख्यमंत्री देवेंद्र फडणवीस यांनी एकत्र विमान प्रवास केला. या विमानप्रवासावर उपमुख्यमंत्री एकनाथ शिंदे यांची प्रतिक्रिया देत जोरदार टीका केली. 'विमानापेक्षा इमान महत्वाचे, कपटी मित्र किती घातक असतो हे देवेंद्र फडणवीस यांना चांगले माहिती असेल, असा खोचक टोला शिंदेनी लगावला. उद्धव ठाकरे यांच्या फुटलेल्या खासदारांच्या मतदारसंघात सभा होत आहेत. या सभावरून देखील एकनाथ शिंदे यांनी त्यांच्यावर टीका केली. 'उबाठा प्रमुखांच्या सभा म्हणजे वरातीमागून घोडे', असं ते म्हणाले.

रायगडावर छत्रपती शिवाजी महाराजांचा ३५३ वा शिवराज्याभिषेक सोहळा साजरा करण्यात आला. या कार्यक्रमाला उपमुख्यमंत्री एकनाथ शिंदे रायगडावर गेले होते. यावेळी माध्यमांशी संवाद साधताना त्यांनी उद्धव ठाकरे आणि फडणवीस यांच्या विमान प्रवासावर प्रतिक्रिया देताना टीका केली. रायगड पालकमंत्रीपदाचा निर्णय लवकरच होणार असल्याची ग्वाही त्यांनी यावेळी दिला.

एकनाथ शिंदे यांनी सांगितले की, '२०१९ साली शिवसेना आणि भाजप या दोघांनाही एकाच विमानातून प्रवास करण्याचे तिकीट जनतेने दिले होते. मात्र त्यावेळी ऐनवेळी उद्धव ठाकरे यांनी स्वार्थासाठी विमान बदलून काँग्रेससोबतचे विमान धरत जनमताशी बेइमानी केली. त्यामुळेच आज ते गटांगळ्या खात सुटले आहेत. त्यामुळेच आता त्यांचे हे प्रयत्न सुरू आहेत. मात्र देवेंद्र फडणवीस हे फार हुशार आहेत. त्यांना २०१९ साली कपटी मित्र किती घातक असतो ते पाहिलेले आहे. त्यामुळे मला याबाबत अधिक काही बोलण्याची आवश्यकता नाही.'

उद्धव ठाकरे यांच्या सभांवरून देखील एकनाथ शिंदे यांनी टीका केली. ते म्हणाले की,'उद्धव ठाकरे आज सभा घेत फिरत असले तरीही त्यांना यावेळीही मीच घरातून बाहेर काढले आहे. मराठीत एक म्हण आहे वरातीमागून घोडे अशी त्यांची आज अवस्था आहे. सगळे निघून गेल्यावर हे पोहचत आहेत. त्यामुळे जो बुंद से गयी वो हौदसे नहीं आयेगी एवढा टोला शिंदे यांनी उद्धव ठाकरे यांना लगावला.'