जळगावात शिंदे गटाला मोठा धक्का; बड्या नेत्याचा शेकडो कार्यकर्त्यांसह राष्ट्रवादीत प्रवेश, राजकीय वर्तुळात खळबळ

महायुतीतील सत्तेत वाटेकरी असलेल्या राष्ट्रवादीकडे मंत्रालयातील सर्वात महत्त्वांच खातं म्हणजे अर्थ खातं जाणार आहे. हिवाळी अधिवेशनाआधी राष्ट्रवादी पक्षाला अर्थखातं मिळणार असल्याची चर्चा आहे. राज्यपातळीवर ही उलाढाल होत असतानाच अजित पवार गटानं जळगावमध्ये शिवसेनेला मोठा धक्का दिलाय. शिवसेनेच्या जिल्हा संपर्क प्रमुख राहिलेल्या निलेश पाटील यांनी शेकडो कार्यकर्त्यांसह शिंदे गटाला रामराम ठोकलाय. या प्रवेशामुळे शिंदे गटाचे नेते तथा पालकमंत्री गुलाबराव पाटील यांनाही धक्का बसल्याचे बोलले जातेय.

निलेश पाटील यांनी थेट राष्ट्रवादी काँग्रेसच्या अजित पवार गटात रविवारी प्रवेश केला. सहकार मंत्री बाबासाहेब पाटील, आमदार अनिल पाटील, माजी मंत्री गुलाबराव देवकर, डॉ. सतीश पाटील, प्रतिभा शिंदे आणि संजय पवार, योगेश देसले आदी नेत्यांच्या उपस्थितीत हा पक्षप्रवेश सोहळा पार पडला.

निलेश पाटील यांनी शिवसेनेला का केला जय महाराष्ट्र?

राष्ट्रवादीत प्रवेश केल्यानंतर नीलेश पाटील शिवसेनेच्या कार्यभारावर टीका केली. शिवसेनेत काम करत असताना आपल्याला विश्वासात घेतले जात नव्हते, तसेच पक्षाच्या संघटनात्मक कामात सातत्याने डावलले जात होतं,अशी नाराजी निलेश पाटील यांनी व्यक्त केली. मंत्री गुलाबराव पाटील यांच्या कार्यपद्धतीवर त्यांनी गंभीर आक्षेप घेत पक्षात काम करण्याची संधी आणि जबाबदाऱ्या पार पाडताना योग्य वागणूक मिळाली नसल्याचाही आरोप केला होता. याच कारणामुळे नाराजीतूनच आपण शिवसेना सोडण्याचा निर्णय घेतल्याचे त्यांनी सांगितलं.