NCP MLA Sunil Shelke: 'मी जादूटोणा करतो, EVM हॅक करतो', राष्ट्रवादीच्या आमदाराकडून ईव्हीएम वश

ऐकलंत. ओम फट स्वाहा करणारे हे आहेत अजित पवारांच्या राष्ट्रवादीचे मावळचे आमदार सुनील शेळके.नुसताच मंत्र म्हणून ते थांबले नाहीत तर जादूटोणा करुन ईव्हीएम हॅक करतो, असा दावाही केलाय. ज्या EVM म्हणजेच मतदान यंत्रावरुन देशभरात विरोधकांनी आरोपांची राळ उठवली आहे. ते ईव्हीएम शेळकेंना वश झालंय. म्हणूनच आगामी निवडणुकीत आपले उमेदवार शंभर टक्के विजयी होणार अशा विश्वासही त्यांनी व्यक्त केलाय.

शेळकेंच्या या कॉमेडीवर हशा पिकला.टाळ्या पडल्या. मात्र विरोधकांना ध़डकी भरलीये कारण वडगाव मावळ येथे राष्ट्रवादीच्या बैठकीत शेळके फक्त मंत्र मारून थांबले नाहीत तर त्यांनी मित्रपक्ष भाजपलाही थेट आव्हान दिलंय. निवडणुकीत एकही जागा महायुतीला देणार नाही आणि त्यातही भाजपला तर नाहीच नाही, असं म्हणत नव्या वादाला तोंड फोडलं आहे.

सोलापूर जिल्ह्यातील मारकडवाडी येथील ग्रामस्थांचं ईव्हीएम विरोधातलं आंदोलन चांगलंच गाजलं होतं. सगळ्या विरोधकांनीही ईव्हीएमवर संशय व्यक्त करत बॅलेट पेपरवर निवडणूक घेण्याची मागणी केली आहे.त्यामुळे शेळकेंनी केलेलं ओम फट स्वाहा अगदीच हलक्यात घेऊ नका. आगामी निवडणुकीत मावळमधील त्यांचा जादूटोणा किती यश देतोय ते पाहायचं.