Maharashtra Politics: ऐतिहासिक विजय! दोंडाईचामध्ये भाजपच्या सर्व २६ नगरसेवकांसह नगराध्यक्ष बिनविरोध

राज्यातील अनेक नगरपंचायती आणि नगरपरिषदांमध्ये कमळ फुलताना दिसत आहे. भाजपचे उमेदवार थेट बिनविरोध निवडून येऊ लागले आहेत. धुळ्यामधील दोंडाईचा नगरपरिषदेमध्ये सर्व २६ जागांवर भाजपचे उमेदवार बिनविरोध निवडून आले आहेत. राज्याचे मंत्री जयकुमार रावल (Jaykumar Rawal ) यांच्या नेतृत्वाखाली ही निवडणूक लढवण्यात आली. नगरपरिषदेमधील संपूर्ण बिनविरोध ठरणारी दोंडाईचा नगरपरिषद ही राज्यातील पहिलीच नगरपरिषद ठरलीय.

दोंडाईचा नगरपरिषदेच्या स्थापनेनंतर यंदा पहिल्यांदाच निवडणूक होणार होती. या ठिकाणी महाविकास आघाडीच्या सर्वच उमेदवारांनी त्यांचे अर्ज मागे घेतले. यामुळे नगराध्यक्षांसह सर्व २६ जागांवर भाजपाचे उमेदवार बिनविरोध निवडून आलेत. दोंडाईच्या नगराध्यक्षपदी मंत्री जयकुमार रावल यांच्या मातोश्री नयन कुमार रावल याही बिनविरोध निवडून आल्यात.

नगर पंचायत आणि नगर परिषदेच्या मतदाना आधीच भाजपचे तीन नगराध्यक्ष बिनविरोध निवडून आले आहेत. सोलापूर जिल्ह्यातील अनगर नगरपंयायत, धुळे जिल्ह्यातील दोंडाईचा आणि आता जळगाव जिल्ह्यातील जामनेर नगरपालिकेत अध्यक्षपदी भाजप नेत्यांची बिनविरोध निवड झालीय.

दोंडाईचा वरवाडे नगर परिषदेसाठी नगराध्यक्ष पदासाठी नयन कुवर रावल आणि महाविकास आघाडीच्या उमेदवार शरयू भावसार यांनी अर्ज दाखल केला होता. मात्र महाविकास आघाडीच्या उमेदवार शरयू भावसार यांच्या उमेदवारी अर्जावर भाजपकडून आक्षेप घेण्यात आला होता. शरयू भावसार यांचे वडील अॅड. एकनाथ भावसार यांची घरपट्टीची थकबाकी असल्याचे कारण पुढे करत त्यांचा उमेदवारी अर्ज बाद करण्यात आला. त्यानंतर शरयू भावसार यांच्या कुटुंबियांनी न्यायालयात धाव घेतली.