Maharashtra Politics: दोंडाईचामध्ये डाव साधला; शरद पवार गटात खिंडार, तीन मोठ्या नेत्यांचा भाजपमध्ये प्रवेश

भूषण अहिरे, साम प्रतिनिधी

आहिल्यानगरनंतर आता दोंडाईचामध्ये भाजपनं डाव साधत शरद पवार गटाला जबर धक्का दिलाय. राज्यातील अनेक स्वराज्य संस्थांवर कमळ फुलवण्यासाठी भाजप नेते कामाला लागलेत. नगरपरिषद निवडणूक जसजशी जवळ येऊ लागली आहे, तसतसा सर्वच पक्षांच्या हालचालींना वेग आलाय. सर्वत्र पक्षप्रवेशांचा सोहळे होत आहेत.

दोंडाईचामध्ये भाजपने शरद पवार गटाला धक्का देत आपली ताकत वाढवलीय. महाविकास आघाडीमधील अनेक नेते महायुतीमध्ये जात आहेत. स्थानिक राजकारणात पक्ष मजबूत होण्यासाठी भाजप जागोजागी ऑपरेशन लोट्स राबवत आहे. दोंडाईचामध्ये भाजपनं शरद पवार गटाला मोठा धक्का दिलाय.

जयकुमार रावल यांच्या उपस्थितीत माजी नगरसेवकांनी भाजपामध्ये पक्षप्रवेश केलाय. हा शरद पवार यांना शरद पवार गटाला मोठा धक्का मानला जात आहे. आदिवासी समाजाचे नेते व माजी नगरसेवक रवी जाधव यांच्यासह माजी तीन नगरसेवक व शेकडो समर्थकांनी कमळ हाती घेतलंय.

या पक्षप्रवेशामुळे भाजपची ताकद आणखीनच वाढली आहे. माजी नगरसेवकांच्या या पक्ष प्रवेशामुळे येणाऱ्या नगरपालिका निवडणुकीत मोठे राजकीय समीकरणे बदलणार आहेत. याचा फायदा भारतीय जनता पक्षाला होईल असे चित्र बघावयास मिळत आहे.

अहिल्यानगर जिल्ह्यात मोठा राजकीय भूकंप

भाजपने रोहित पवार यांना मोठा धक्का दिलाय. राष्ट्रवादी काँग्रेस शरद पवार पक्षाच्या बड्या नेत्यासह अनेक पदाधिकाऱ्यांनी भाजपमध्ये पक्षप्रवेश केला. अहिल्यानगरचे माजी जिल्हा परिषद सदस्य दत्तात्रय वारे यांच्यासोबत माजी नगरसेवक, सरपंच आणि उपसरपंच यांनी भाजपमध्ये प्रवेश केलाय.

आगामी नगर परिषदा आणि नगर पंचायतींच्या निवडणुकांच्या तोंडावर हा पक्षप्रवेश झाल्यानं हा रोहित पवार यांना मोठा धक्का बसल्याचं म्हटलं जात आहे. भाजपचे प्रदेशाध्यक्ष रवींद्र चव्हाण यांच्या उपस्थितीमध्ये मुंबईत हा पक्षप्रवेश सोहळा पार पडला.