Maharashtra Politics: उद्धव ठाकरेंना एकनाथ शिंदेंचा जोरदार धक्का; हजारो कार्यकर्त्यांसह जालन्यातील बडा नेता शिवसेनेत जाणार

देशाच्या सर्वोच्च न्यायालयात शिवसेना पक्ष चिन्ह, पक्षाच्या नावाबाबत सुनावणी होणार आहे. दुसऱ्या बाजुला जालन्यात मोठी राजकीय घडामोड झालीय. सकाळी हकालपट्टी करण्यात आलेल्या नेत्यानं शिंदे गटात प्रवेश करण्याचा निर्णय घेतलाय. जालना जिल्हाप्रमुख भास्कर आंबेकर यांना ठाकरे गटातून काढल्यानंतर शिंदेंनी लागलीच डाव टाकत भास्कर आंबेकर यांना पक्षात घेण्याचा निर्णय घेतलाय.

स्थानिक स्वराज्य संस्थेच्या निवडणुकांची घोषणा झाल्यापासून स्थानिक राजकारण तापलंय. प्रत्येक पक्ष आपली ताकद वाढवत आहे. त्याच्यासाठी युद्धपातळीवर इतर पक्षातील नेत्यांना आपल्या गोटात ओढून आणत आहेत. एकीकडे शिंदे गटाची ताकत संपलीय, अशी टीका ठाकरे गटाचे नेते करत आहेत. मात्र दुसरीकडे शिंदे गटात मोठी इनकमिंग होतेय.

ठाकरे गटातूनही अनेक नेत्यांनी शिंदे गटात प्रवेश केलाय. स्थानिक स्वराज्य संस्थेच्या निवडणुकांची घोषणा झाल्यापासून पक्षप्रवेशाचा हंगाम सुरू झालाय. अनेक नेत्यांनी एका पक्षातून दुसऱ्या पक्षात उड्या मारल्या आहेत. आज जालना जिल्हा प्रमुख भास्कर आंबेकर हजारो समर्थकासह शिवसेनेमध्ये प्रवेश करणार आहेत. उपमुख्यमंत्री एकनाथ शिंदे यांच्या उपस्थितीमध्ये त्यांचा पक्षप्रवेश होणार आहे.

जालन्यात ठाकरे गटाला खिंडार पडलंय. जालन्याचे ठाकरे गटाचे जिल्हाप्रमुख ठाकरे गटाला सोडचिट्टी देत आज शिंदेंच्या शिवसेनेमध्ये प्रवेश करणार आहेत. मागील 39 वर्षापासून ठाकरेंच्या पाठीशी असणाऱ्या भास्कर आंबेकरांनी आज शिंदे गटात जाण्याचा निर्णय घेतलाय. शिंदे गटात प्रवेश करण्याच्या वृत्तावर प्रतिक्रिया देताना आंबेकर म्हणाले, उद्धव ठाकरेंच्या शिवसेनेमध्ये आपल्याला डावललं जात होतं. उद्धव ठाकरेंच्या आजूबाजूची लोक योग्य वागणूक देत नाहीत. जालना जिल्ह्यातील ठाकरेंची शिवसेना दुसऱ्या शहरातून हाताळली जात असल्याचा आरोप आंबेकरांनी यावेळी केला.

दरम्यान भास्कर आंबेकर यांच्या शिवसेनेतील पक्षप्रवेशाची माहिती समोर आल्यानंतर ठाकरे गटानेही आपली प्रतिक्रिया दिलीय. भास्कर आंबेकर यांनी पक्षविरोधात कारवाया केल्या आहेत. त्यामुळे शिवसेना उद्धव बाळासाहेब ठाकरे पक्ष प्रमुख उद्धव ठाकरे यांच्या आदेशानंतर भास्कर आंबेकर यांची पक्षातून हकालपट्टी करण्यात आलीय, अशी माहिती जालना ठाकरे सेनेनेकडून देण्यात आलीय.