Maharashtra Monsoon Session: ब्रेकिंग! चंद्रकांत पाटील यांनी घेतली उद्धव ठाकरे यांची भेट, दादांकडून चॉकलेट देत ठाकरेंचे स्वागत; EXCLUSIVE VIDEO

वैदेही कानेकर, मुंबई, ता. २७ जून २०२४

राज्याच्या पावसाळी अधिवेशनाला आजपासून सुरूवात होत आहे. अधिवेशनाच्या पहिल्याच दिवशी राज्य सरकारविरोधात विरोधकांनी आक्रमक भूमिका घेत विधानभवनाच्या पायऱ्यांवर आंदोलन केले. विशेष म्हणजे शिवसेना ठाकरेगटप्रमुख उद्धव ठाकरे हे अधिवेशनाच्या पहिल्याच दिवशी विधानभवनात दाखल झाले. यावेळी भाजप नेते चंद्रकांत पाटील यांनी त्यांचे स्वागत करत चॉकलेट भेट दिले. उद्धव ठाकरे यांच्यासह अंबादास दानवे आणि अनिल परबही यावेळी उपस्थित होते.

चंद्रकांत पाटील- उद्धव ठाकरेंची भेट!

राज्याच्या पावसाळी अधिवेशनाला आजपासून सुरूवात होत आहे. अधिवेशनाला नेहमी शेवटच्या दिवशी हजर राहणारे उद्धव ठाकरे आज पहिल्याच दिवशी हजर राहिल्याने सर्वांच्याच भुवया उंचावल्या. विशेष म्हणजे भाजप नेते आणि राज्याच उच्च शिक्षण मंत्री चंद्रकांत पाटील यांनी ठाकरेंची भेट घेत स्वागत केले.

चॉकलेट देऊन स्वागत अन् अनिल परबांना शुभेच्छा..

मंत्री चंद्रकांत पाटील यांनी उद्धव ठाकरे आणि अंबादास दानवे यांची भेट घेतली. यावेळी विधान परिषदेचे उमेदवार अनिल परबही उपस्थित होते. या भेटीत चंद्रकांत पाटील यांनी उद्धव ठाकरे आणि अंबादास दानवे यांना चॉकलेट भेट दिले. तसेच तुम्हाला निकालाच्या आधीच शुभेच्छा देतो, असे म्हणत अनिल परब यांना पेढाही भरवला.

ठाकरे- फडणवीसांचीही भेट! (Uddhav Thackeray and Devendra Fadnavis meet)

विशेष म्हणजे चंद्रकांत पाटील यांनी भेट घेतल्यानंतर उपमुख्यमंत्री देवेंद्र फडणवीस आणि उद्धव ठाकरे यांचीही विधानभवन परिसरात भेट झाली. देवेंद्र फडणवीस आणि ठाकरेंनी एकाच लिफ्टमधून प्रवास केला. अनेक वर्षांनंतर जुने सहकारी एकत्र आल्याने सर्वांच्याच भुवया उंचावल्याचे पाहायला मिळाले.