Chhatrapati Sambhaji nagar : २ मुलांचा खर्च झेपेना, माफी मागितली! चिठ्ठीत व्यथा मांडून हतबल बापानं शिवारातच संपवलं आयुष्य

छत्रपती संभाजीनगर, ता. २७ जून २०२४

दोन मुलांच्या शिक्षणाचा खर्च झेपत नाही म्हणून शेतकऱ्यानं आपलं आयुष्य संपवल्याची दुर्दैवी घटना छत्रपती संभाजीनगरमध्ये घडली. लाडसावंगी येथे गुरुवारी सकाळी ६ वाजताच्या सुमारास ही घटना घडली.

बाबासाहेब पडूळ असं आत्महत्या केलेल्या शेतकऱ्याचं नाव आहे. पडूळ हे अल्पभूधारक शेतकरी होते. त्यांच्याकडे २० गुंठे शेतजमीन आहे. या शेतीतून मिळणाऱ्या उत्पन्नावरच त्यांच्या कुटुंबाचा उदरनिर्वाह आहे.

पडूळ हे अल्पभूधारक शेतकरी असून, ते पत्नी एक मुलगा आणि मुलगी यांच्यासोबत लाडसावंगी येथे राहत होते. ते गुरुवारी सकाळी साधारण सहा वाजता शेतावर गेले. शेतावरील जनावरांना चारा देण्यात जात असल्याचं त्यांनी घरातल्यांना सांगितलं होतं. काही वेळानं त्यांचे भाऊ रामू पडूळ हे शेतावर गेले. तिथं बाबासाहेब हे गळफास घेतलेल्या अवस्थेत आढळून आले. त्यांनी तात्काळ घरी कळवले. पडूळ यांना तात्काळ छत्रपती संभाजीनगरमधील घाटी रुग्णालयात नेण्यात आलं. तिथं डॉक्टरांनी तपासणी केली. त्यांनी पडूळ यांना मृत घोषित केले. या घटनेने पडूळ कुटुंबावर दुःखाचा डोंगर कोसळला.

छत्रपती संभाजीनगरच्या घाटी हॉस्पिटलमध्ये त्यांचा मृतदेह शवविच्छेदनासाठी नेण्यात आला. याबाबतची माहिती मिळताच कुटुंबीय आणि गावकऱ्यांनी तिथं मोठी गर्दी केली. या घटनेनं गाव आणि परिसरात हळहळ व्यक्त होत आहे.