Silver Coins Treasure: घराच्या खोदकामादरम्यान सापडला खजिना; बातमी गावभर पसरताच गावकऱ्यांची उडाली झुंबड

योगेश काशिद, साम प्रतिनिधी

सोने-चांदीचे दर दिवसेंदिवस गगनाला भिडत आहेत. सोनं काय चांदीही घेणं सर्वसामन्याच्या आवाक्याबाहेर गेलंय. अशात जर समजा तुम्हाला अचानक चांदीचे घबाड सापडलं तर? तेही घराचं खोदकाम करताना सापडलं तर? दरम्यान बीड जिल्ह्यातील आष्टी तालुक्यातच अशीच घटना घडली आहे. आष्टी तालुक्यातील सांगवी पाटण येथे घराच्या खोदकामादरम्यान जुन्या चांदीच्या नाण्यांचा मोठा साठा सापडल्याने खळबळ उडाली आहे.

ही बातमी वाऱ्यासारखी पसरल्यानंतर घटनास्थळी मोठी नागरिकांची झुंबड उडाली. त्यानंतर पोलिसांनी पंचनामा करून तहसील प्रशासनाकडे ही नाणी जमा केली. परंतु यातील बरीच नाणी गायब असल्याचं नागरिकांकडून सांगितले जात आहे. प्रशासनाने आतापर्यंत 250 नाणी जप्त केली आहेत.

मिळालेल्या माहितीनुसार, सांगवी पाटण येथील शशिकांत खुटाळे यांच्या घराच्या बांधकामाचे काम सुरू होतं. खोदकामातून काढलेल्या मातीच्या ढिगाऱ्यावर काही मुलं खेळत होती, त्यावेळी त्यांना काही चांदीची नाणी आढळली. मुलांकडे नाणी दिसताच ही माहिती संपूर्ण गावात पसरली. त्यानंतर खोदकामाच्या ठिकाणी लोकांची गर्दी झाली. त्यानंतर याची माहिती पोलीस आणि महसूल विभागाला देण्यात आली.

तहसील प्रशासनाने पुरातत्व विभागाला याबाबत माहिती दिलीय. खोदकामादरम्यान जवळपास चार ते पाच किलो नाण्यांचा साठा आढळून आल्याचा संशय आहे. 250 चांदीची नाणी जप्त प्रशासनाने जप्त केली आहेत. महसूल प्रशासनाने 250 नाणी ताब्यात घेतली असली तरी, प्रत्यक्षात नाण्यांची संख्या यापेक्षा अधिक असल्याचे स्थानिक नागरिकांकडून सांगितले जातंय. खोदकामात जवळपास 4 ते 5 किलो चांदीची नाणी सापडली असावीत, असा संशय व्यक्त केला जातोय. तहसील प्रशासनाने या ऐतिहासिक ठेव्याबद्दल पुरातत्व विभागाला माहिती दिली आहे या नाण्यांचा काळ कोणता आहे आणि त्यांचे ऐतिहासिक महत्त्व काय, हे पुरातत्व विभागाच्या तपासणीनंतरच स्पष्ट होणार आहे.