Dhangar Reservation: 'धनगर आरक्षणाला मुठभर आदिवासींचा विरोध..' आमदार गोपीचंद पडळकर

चेतन व्यास, प्रतिनिधी

Gopichand Padalkar News:

एकीकडे राज्यात मराठा आरक्षणासाठी मनोज जरांगे यांनी लढा उभारलेला असतानाच आरक्षणाच्या मागणीवरुन धनगर समाजही आक्रमक झाला आहे. भाजप नेते आमदार गोपीचंद पडळकर यांनी धनगर जागर यात्रेला सुरूवात केली असून धनगर आरक्षणासाठी सरकार सकारात्मक असल्याची माहिती त्यांनी दिली आहे.

काय म्हणाले गोपीचंद पडळकर?

आमदार गोपीचंद पडळकर यांची वर्ध्यातील देवळी येथे धनगर जागर यात्रा सभा झाली. यावेळी बोलताना पडळकर यांनी धनगर आरक्षणाला विरोध करणाऱ्यांचा चांगलाच समाचार घेतला. "धनगर आरक्षणाला आदिवासींचा विरोध नाही. आदिवासीच्या 33 जमाती धनगर आरक्षणाच्या बाजूने आहेत. मात्र मुठभर लोक या आरक्षणाच्या विरोधात आहेत," असे पडळकर म्हणाले.

तसेच पुढे बोलताना "आदिवासी समाजाचे नव्वद टक्के लोक आहेत ज्यांना एसटीचा दाखलाच मिळाला नाही. त्यातील 33 आदिवासी अन्यायग्रस्त जमातीला धनगर जागर यात्रा झाल्यानंतर आदिवासी जमातीला एसटीचा दाखला मिळवून देण्यासाठी संकल्प अभियान राबवणार" असल्याचेही त्यांनी सांगितले.

सरकार आरक्षणासाठी सकारात्मक...

दरम्यान, यावेळी गोपीचंद पडळकर यांनी धनगर जागर यात्रेत उपस्थित समाज बांधवाना धनगर आरक्षणासाठी सरकार सकारात्मक असल्याची माहिती दिली. सोबतच हा यात्रेचा पहिला टप्पा संपल्यानंतर तालुका स्तरावर धनगर समजबांधवांचे मेळावे घेणार असल्याचेही त्यांनी सांगितले. (Latest Marathi News)