Maharashtra Assembly Winter Session: महाराष्ट्रात भीक मागण्यास बंदी येणार; विधानसभेनंतर विधान परिषदेतही विधेयक मंजूर

राज्यात आता लवकरच भीक मागण्यास बंदी घालण्यात येणार आहे. विधानसभेपाठोपाठ विधान परिषदेमध्येही याबाबत विधेयक मंजूर करण्यात आलं आहे. सभागृहात गोंधळ सुरू असतानाच हे विधेयक मंजूर करण्यात आलं.त्यामुळे तालिका सभापती नीलम गोऱ्हे, शिवसेनेच्या आमदार मनिषा कायंदे, राष्ट्रवादीचे अमोल मिटकरा यांच्यासह अनेकांनी नाराजी व्यक्त केलीय. विधान परिषदेत हे विधेयक मंजूर झाल्यानंतर आता सभापतींच्या दालनात शनिवारी बैठकीचं आयोजन करण्यात आलंय.

विधान परिषदेत राज्यात भीक मागण्यास प्रतिबंध घालणारे विधेयक मंजूर करण्यात आले. त्यावेळी सभागृहात आमदारांनी गोंधळ घातला होता. राज्याच्या मंत्री अदिती तटकरेंनी हे विधेयक मांडलं होता. मात्र त्यावर आमदार मनीषा कायंदे, अमोल मिटकरी आणि तालिका सभापती निलम गोर्हे यांनी त्यावर असमाधान व्यक्त केलं. विधेयकाबाबत माहिती दिलेल्या पुस्तिकेतील स्पष्टीकरणावर नीलम गोऱ्हेंनी असमाधान व्यक्त केलंय.

महारोगी शब्द वगळण्यासाठी आलेल्या विधेयकाचा आणि त्याचे शीर्षक यात ताळमेळ नसल्याची प्रतिक्रिया आमदार एकनाथ खडसेंनी दिली. सभागृहातील अनेक सदस्य असमाधानी असतानाही विधेयक मंजूर करण्यात आलं. या संबंधित विधान परिषद सभापतींच्या दालनात शनिवारी बैठकीचे आयोजन करण्यात आले आहे.

लाडक्या बहि‍णींना २१०० रुपये कधी मिळणार?

लाडकी बहीण योजनेबाबत आज विधानसभेत चर्चा झाली. या चर्चेदरम्यान लाडक्या बहिणींना २१०० रुपये देण्यावरून विरोधकांनी सरकारला धारेवर धरण्याचा प्रयत्न केला. शिवसेना ठाकरे गटाचे नेते भास्कर जाधव यांनी सरकारला लाडकींना २१०० रुपये कधी देणार? सवाल केला. यावर राज्याचे उपमुख्यमंत्री एकनाथ शिंदे यांनी उत्तर देत. 'लाडक्या बहिणींना योग्यवेळी २१०० रुपये देऊ.', असे आश्वासन उपमुख्यमंत्र्यांनी विधानसभेत दिलं.