लाचखोरीत पोलिस विभाग सर्वात पुढे! एसीबीच्या अहवालातून धक्कादायक वास्तव समोर, २ कोटींहून अधिकचा व्यवहार उघड...

संजय गडदे, मुंबई प्रतिनिधी, साम टीव्ही मराठी

Maharashtra ACB bribery report 2026 : राज्यातील सरकारी यंत्रणांमधील भ्रष्टाचाराचे चिंताजनक चित्र समोर आले आहे. लाचलुचपत प्रतिबंधक विभागाने (एसीबी) (ribery Cases Maharashtra) जाहीर केलेल्या आकडेवारीनुसार, जानेवारी ते जुलै २०२६ या सात महिन्यांत राज्यभरात ४३९ लाचखोरीचे गुन्हे दाखल करण्यात आले असून, त्यामध्ये २.२० कोटी रुपयांच्या लाचेच्या व्यवहारांचा पर्दाफाश झाला आहे. (Maharashtra ACB Report)

एसीबीच्या अहवालानुसार, लाच मागितलेल्या रकमेत पोलिस विभाग सर्वाधिक पुढे आहे. पोलिस विभागाशी संबंधित प्रकरणांमध्ये ५४.६५ लाख रुपयांची लाच मागितल्याची नोंद झाली आहे. त्यानंतर महसूल व भूमी अभिलेख विभाग (३३.४३ लाख), विक्रीकर विभाग (२१.३६ लाख), सार्वजनिक बांधकाम विभाग (१९.२२ लाख) आणि पंचायत समिती (११ लाख) यांचा क्रमांक लागतो. (Police department tops bribery cases in Maharashtra)

या कालावधीत दाखल झालेल्या ४३९ प्रकरणांमध्ये ६३२ आरोपींना नामजद करण्यात आले असून, त्यात १०९ दलालांचा समावेश आहे. हे दलाल सरकारी अधिकाऱ्यांच्या वतीने लाचेचे व्यवहार घडवून आणत असल्याचे तपासात समोर आले आहे.

गेल्या वर्षी याच कालावधीत ४१९ गुन्हे दाखल झाले होते. यंदा हा आकडा ४३९ वर पोहोचल्याने राज्यातील भ्रष्टाचाराचे प्रमाण अद्यापही चिंताजनक असल्याचे एसीबीच्या आकडेवारीवरून स्पष्ट झाले आहे.