Latur Zilla Parishad Election Result: 'अब तक 56' ! लातूरमध्ये काँग्रेसला धक्का; भाजपची मुसंडी, मनसेच्या 'इंजिन'ला गती, जाणून घ्या आतापर्यंतचे सर्व निकाल

राज्यात जिल्हा परिषद आणि पंचायत समितीच्या निकालाला सुरुवात झाली आहे. या निवडणुकांना मिनी मंत्रालय म्हटलं जातं. यात लातूरमध्ये भाजपनं काँग्रेसला दणका दिलाय. लातूर जिल्हा परिषदेसाठी ५९ जागा, तर १० पंचायत समित्यांमधील ११८ जागांसाठी मतदान झालं. जिल्ह्यातील ९ लाख ५१ हजार २३५ मतदारांनी मतदानाचा हक्क बजावला असून येथे ६४ टक्के मतदान नोंदवण्यात आलं होतं.

लातूर जिल्हा परिषदेच्या निवडणुकीत प्रामुख्याने काँग्रेस आणि भाजप यांच्यात थेट लढत आहे. २०१७ च्या निवडणुकीत भाजपने ३६ जागा जिंकत एकहाती सत्ता मिळवली होती. यंदा काँग्रेसचे अमित देशमुख आणि भाजपचे संभाजीराव निलंगेकर पाटील व अभिमन्यू पवार यांच्यासाठी ही निवडणूक प्रतिष्ठेची ठरली होती.

लातूर जिल्हा परिषदेत मनसेने उधळला विजयाचा गुलाल

राज ठाकरे यांच्या नेतृत्वाखालील महाराष्ट्र नवनिर्माण सेनेने (मनसे) लातूर जिल्हा परिषदेत अनपेक्षित यश मिळवलंय. मनसेने तीन जागांवर विजय मिळवला आहे. या निकालांमुळे मराठवाड्यातील राजकारणात मनसेचा प्रवेश झालाय. रेणापूर तालुक्यात पानगाव जिल्हा परिषद गटातून डॉ. सुनील नागरगोजे (मनसे) यांनी विजय मिळवला आहे. तर पंचायत समिती गणातून मोनिका रवी सूर्यवंशी आणि श्रीदेवी गालफाडे (दोघी मनसे) यांनी यश मिळवलंय. या विजयामुळे लातूर इंजिन धावू लागलंय.

आता पर्यंतचा निकाल

लातूर जिल्हा परिषद

एकुण जागा-५९/56

भाजप-18

शिवसेना-01

राष्ट्रवादी-11

ठाकरे गट-01

शरद पवार गट -01

काँग्रेस-21

मनसे -01

अपक्ष -02

इतर-

एकूण = 56