Latur Women Constable : दीड दमडीचा वकील; लातुरातील महिला पोलीस कर्मचाऱ्याचा आणखी एक व्हिडिओ

संदीप भोसले, साम टीव्ही

Latur : लातूर शहरातील वाहतूक शाखेच्या महिला कॉन्स्टेबलचा आणखी एक व्हिडिओ समोर आला आहे. या महिला कॉन्स्टेबलने रस्त्यावर थेट वकिलासोबत वाद केल्याचा प्रकार समोर आला आहे. दीड दमडीचा वकील म्हणत महिला पोलीस कर्मचाऱ्याने वकिलासोबत बाचाबाची केली. वाहतुकीचे नियम मोडल्यानंतर महिला पोलीस कॉन्स्टेबल ही वकील आणि त्याच्या साथीदाराला सुनावत असल्याचे दिसत आहे. सोमवारी याच महिला पोलीस कॉन्स्टेबलने ट्रिपल सीटवरून तीन तरुणींना सुनावलं होतं.

लातूरमधील वादग्रस्त असलेल्या वाहतूक शाखेच्या महिला पोलीस प्रणिती मुसने यांचा आणखी एक व्हिडिओ समोर आला आहे. दीड दमडीचा वकील, कुठे टाकायचा तिथे व्हिडिओ टाक, अशा शब्दात महिला पोलीस कॉन्स्टेबलने वकिलाला सुनावलं. या महिला पोलीस कर्मचाऱ्याने एका वकील प्रवाशांसोबत चांगलीच हुज्जत घातली आहे. अरेरावीची भाषा करीत कॉन्स्टेबल वकिलावर दरडवताना दिसत आहे.

लातूर शहरच्या वाहतूक शाखेतील महिला पोलीस प्रणिती मुसने यांनी वाहतुकीचे नियम मोडणाऱ्या वकिलांना चांगलंच सुनावलं. या आधी महिला पोलिसाने ट्रिपल सीट घेऊन दुचाकी चालवणाऱ्या तरुणींना झापलं. तरुणी आणि महिला पोलिसाची चांगलीच बाचाबाची झाली. त्यानंतर आता महिला पोलीस कर्मचाऱ्याने दीड दमडीचा म्हणत वकिलाला वाहतुकीचे नियम सांगितले.

दोघांमध्ये शाब्दिक चकमक होतानाचा क्षण काहींनी मोबाईल कॅमेऱ्यात कैद केला. याच महिला पोलिसाचा आता दुसरा व्हिडिओ सोशल मीडियावर व्हायरल झाला आहे. या महिला पोलीस कर्मचाऱ्याचा अरेरावीवर नेटकऱ्यांकडून प्रश्न उपस्थित केले जात आहेत.

लातुरातील या पोलीस कर्मचाऱ्याने सकाळीच तीन तरुणींची माफी मागितली. मात्र, दुपारी या तरुणींनी महिला पोलीस कर्मचाऱ्याच्या विरोधात पोलिसांत धाव घेतली. त्यामुळे आता महिला पोलीस कर्मचाऱ्यावर काय कारवाई होते, हे पाहावे लागेल.