Ladki Bahin Yojna : लाडकी बहीण योजनेवर सरकारी तिजोरीतून आत्तापर्यंत किती खर्च?

विधानसभा निवडणुकीत महायुती सरकारला मोठ्या प्रमाणात महिलांनी अर्थात लाडक्या बहिणींनी मतदान केल्याने राज्यात पुन्हा एकदा महायुतीचे सरकार आले आहे. आत्तापर्यंत या योजनेतून २.५ कोटी महिलांना लाभ मिळाला आहे.

राज्यातील २.६ कोटी महिलांनी लाडकी बहीण योजनेसाठी अर्ज केला होता. पैकी २.३ कोटी महिलांना लाडकी बहीण योजनेच्या लाभाचे पैसे मिळाले आहेत. तर १६ लाख महिलांच्या खात्यासोबत आधार लिंक नाही, त्यामुळे लाभ पोहचला नाही. विधानसभा निवडणुकीआधी १७ हजार कोटी रूपये सरकारने महिलांच्या खात्यावर जमा केले.

लोकसभा निवडणुकीच्या अपयशानंतर महायुती सरकारने राज्यात मुख्यमंत्री माझी लाडकी बहीण योजना अंमलात आणली. या लाडकी बहीण योजनेसाठी महायुतीने आतापर्यंत ६ महिन्यांत सुमारे १७ हजार कोटी रुपये वितरित केल्याची बाब माहिती अधिकारातून उघडकीस आली आहे. महायुती सरकारने २०२४ - २०२५ देखील १० हजार कोटी रुपयांची तरतूद केली.

या योजनेंतर्गत प्रत्येक लाभार्थी महिलेच्या खात्यात १५०० रुपये जमा करण्यात येत आहेत. येणाऱ्या वर्षासाठी केलेल्या तरतुदीत पैसे कमी पडतील म्हणून पुरवणी मागणीनुसार सन २०२४-२०२५ साठी लाडकी बहीण योजनेसाठी आणखी २५ हजार कोटी अशाप्रकारे एकूण ३५ हजार कोटी रुपयांची अतिरिक्त तरतूद केली आहे.

दरम्यान, राज्यात लाडकी बहीण योजनेचे लाभार्थी सर्वाधिक पुण्यात आहेत. 20.8 लाख लाभार्थी पुणे जिल्ह्यात आहेत. पुणे जिल्ह्यात विधानसभा निवडणुकीआधी एकूण 21 लाख 11 हजार 946 अर्ज आले होते. त्यापैकी 20 लाख 84 हजार 364 अर्ज स्वीकारण्यात आल्याचे अधिकाऱ्याने सांगितले आहे.