Ladki Bahin Yojana: लाडकीच्या खात्यात मकरसंक्रांतीला ₹३००० जमा होणार का? देवेंद्र फडणवीसांनी एका वाक्यातच विषय संपवला

Devendra Fadnavis on Ladki Bahin Yojana: लाडकी बहीण योजना पुन्हा एकदा वादाच्या भोवऱ्यात अडकली आहे. लाडकी बहीण योजनेचा हप्ता मकरसंक्रांतीला महिलांच्या खात्यात जमा होणार असल्याचे बोलले जात आहे. डिसेंबर आणि जानेवारीचे ३००० रुपये एकत्र येणार आहेत. दरम्यान, आता या योजनेचा हप्ता मकरसंक्रांतीला येणार की नाही, असा प्रश्न निर्माण झाला आहे. यामागचे कारण म्हणजे काँग्रेसने राज्य निवडणूक आयोगाला पत्र पाठवले आहे.

लाडकी बहीण योजनेच्या हप्त्यावरुन काँग्रेसचे निवडणुक आयोगाला पत्र

लाडकी बहीण योजनेला आमचा विरोध नाही, पण महापालिका निवडणूकीनंतर योजनेचा हप्ता वितरित करण्यात यावे, अशी मागणी काँग्रेसने राज्य निवडणूक आयोगाकडे केली आहे.यासंदर्भात पत्रदेखील पाठवले आहे. दरम्यान, आता यानंतर १४ जानेवारीआधी महिलांना पैसे येणार की नाही असा प्रश्न पडला होता. याबाबत आता मुख्यमंत्री देवेंद्र फडणवीसांनी प्रतिक्रिया दिली आहे.

देवेंद्र फडणवीस काय म्हणाले? (Devendra Fadnavis On Ladki Bahin Yojana)

काँग्रेस आणि विरोधक पहिल्यापासून आमच्या लाडक्या बहि‍णींना विरोध करत आहेत. मागच्या काळात जेव्हा योजना सुरु केली तेव्हा ही योजना बंद करा, अशी मागणी केली होती. उच्च न्यायालयातदेखील गेले होते. आता लाडक्या बहि‍णींना पैसे देऊ नका, असं म्हणतात. लाडकी बहीण योजना ही सुरु असलेली योजना आहे. आचारसंहितेमध्ये म्हटले की, कोणतीही सुरु असलेली योजना थांबवता येत नाही. त्यामुळे कोणी कितीही काहीही पत्र लिहली तरीही योजना थांबवता येणार नाही, लाडकी बहीण योजना थांबणार नाही, महिलांना पैसे येतीलच, असं मुख्यमंत्र्‍यांनी म्हटलं आहे.

देवेंद्र फडणवीस यांनी दिलेल्या प्रतिक्रियेवरुन तरी असंच वाटत आहे की, योजनेच्या लाभार्थी महिलांना पैसे दिले जातील. महिलांच्या खात्यात लवकरच पैसे दिले जातील. महापालिकेच्या निवडणुकीआधी ३००० रुपये महिलांच्या खात्यात जमा होण्याची शक्यता जास्त आहे.